FA'ALEALEA E NE-YO LE tagavai O SAMOA
Screenshot - Tiktok
O se tasi o alii pese lauiloa i le lalolagi e suafa ia Shaffer Chimere Smith po'o Ne-Yo na vaaia lona faalealeaina lea o le tagavai (fu'a) o Samoa i se tasi o ona konaseti , lea na fa'atautaia i laufanua o Niu Sila i Palmerston North.
I se vitio lauiloa na faapea ona talatalanoa ai le toatele o tagata i luga o upega tafa'ilagi (Facebook) ma le TikTok. Lea sa faapea ona fa'ate'ia ai le toatele ma faaali ai le latou agaga fiafia ina ua faalealea e lenei alii lauiloa o Ne Yo mai Arkansas Amerika le tagavai Samoa.
I se tasi o fa'amatalaga o lo'o sologa i luga o le upega tafa'ilagi o le Facebook ma le TikTok na vaaia nisi o tagata o faapea na tu'uina e se tagata matamata (audience) le fu'a ia Ne-Yo a'o le'i alu lana fa'afiafiaaga. I nisi o vaega o le vitio na iloa ai le atatata o le alii pese ma faapulou lona tino i le fu'a ina ua ia mauaina mai nisi o tagata Samoa i tua o le pulela'a (stage).
Ina ua valaauina lona suafa e agai mai luga mo lana faafiafiaga , na lagona le leotetele o tagata matamata o le konaseti ina ua aga'i mai Ne-Yo ma le fu'a ma amatalia ai i se tasi o ona pese lauiloa ua ta'ua o le "Miss Independent". O se tasi o pese ua fiafia ai foi le tupulaga iinei Samoa ma le lalolagi atoa.
Na avea lenei mea ua tupu ma se mitamitaga i le toatele o tagata Samoa ina ua latou vaaia lea tulaga. Sa toatele e na faalia o latou manatu i luga o le upega tafa'ilagi ina ia fae'e se suafa matai o le alii pese, o nisi o tausuaga o le mamalu o le atunuu na avea ma vaega ua atili lauiloa ai lenei vitio.
I se fa'atalanoaga a lenei leitio (Eye Spy Radio) ma se tasi o tama'ita'i Samoa e suafa ia Stefamee Schwalger le na auai i lenei konaseti. Na faailoa mai sa toatele le mamalu o le au matamata na o latou amania ma iloaina le fu'a ina ua fa'alealea e Ne-Yo.
O le alii ia Ne-Yo po'o Shaffer Chimere Smith o se tagata musika lauiloa i le lalolagi atoa ma sa ia iloga fo'i i nisi o ata tifaga
lauiloa pei o le "Stomp The Yard" ma nisi o ana pese pei o le "Let Me Love You" ma le tele.