TALI LE AFIOGA A LE FOFOGA FETALAI OLE MAOTA I LE TAITAI O LE ITU AGAI.

OFISA OLE FONO FAITULAFONO A SAMOA

9 Mati 2022

Hon. TUILAEPA Lupesoliai Dr. Sailele Malielegaoi

TAITAI O LE ITU AGAI

MATAUPU: KOMITI SUESUE FAAPITOA A LE PALEMENE TULAFONO 0 FANUA MA SUAFA 2020

Malo le soifua manuia ma le lagi e mama

E talitonu o lo o manuia lau Afioga i le Taitai o le Itu Agai.

Ou te faafetai atu mo lau Tusi o le aso 9 Mati 2022 ua ou taulimaina, e uiga i le mataupu ua taua i luga.

Ou te tali manino atu e faapea:-

0 lo o tumau pea le amanaia e lo'u tagata o lo'u valaauina i le Tofi o le Fofoga Fetalai, ma o lo o o'u malamalama lelei foi i tulaga uma e tausia ai le taualoa ma le mamalu o le Palemene, i le faatuatuaga o le Fono Aoao Faitulafono ua tuuina mai ia te au;

0 le galuega ua tuuina atu i le Komiti Suesue Faapitoa a le Palemene, sa faavae i le Lafo na faamaonia e le Fono Aoao Faitulafono, e aofia ai ma Sui Usufono ua filifilia iai mo lea galuega;

0 lea foi galuega, na matua manino lava la'u Folasaga i le Maota faapea le Saunoaga a le Afioga i le Tamaitai Palemia, mo le silafia e le Maota ma le atunuu, i le agaga na naunauta'i ai e faatino. E leai ma se agaga e toe faitau mai ni futia ua sola ma le galuega sa faatino e le Komiti sa iloiloina ia Tulafono i le Paeaiga ua tuanai atu;

Ou te malamalama lelei foi i le 2/3 e pei ona taua. Peitai, e ese le agaga o lo o e aumaia, ese le agaga o le galuega o lo o faatinoina nei. 0 sasi foi o le Aufaigaluega e pei ona e toe faailoa mai, e le tatau ona e faauigaina o nai mea laiti. Afai ua faatamala lau Afioga o Le sa Minisita o le Ofisa o le Fono i le taimi o nei faafitauli, e tatau ona aumai lou faatuatuaga i le galuega lelei ma le amiotonu, ua faagasolo nei. E leai foi ni auala Faa-Palemene o iai, e foia ai le faafitauli ogaoga ua tulai mai;

0 lou toe taua o le suafa o le Sui Fofoga Fetalai i sona finagalo sa faaalia i Faatalanoaga Faalauaitele ma Iloiloga sa faatino e le Komiti na iloiloina nei Tulafono i lena Paeaiga, e tasi lea aiaiga taua sa tatau ona puipui malu iai lena Komiti ma lau Afioga, ia Faalilolilo molimau e tuuina atu i luma o Komiti Faa-Palemene, e tusa ma aiaiga o Tulafono Tumau a le Palemene.

0 lea foi la ua tau vavala mai, sa le i malupuipui aia tatau a tagata lautele sa auai atu i taualumaga a lena Komiti mo latou finagalo faaalia;

0 le auai atu o le Susuga Auapaau Aloitafua Mulipola i le Komiti i lena vaitau e pei ona e taua, o lona lava lena tulaga faa-tagata lautele o le atunuu. 0 faiga faa-Temokarasi moni na. E iai avanoa mo finagalo faaalia o tagata lautele e faufau ai a tatou Tulafono ma Tonufai mo le manuia o le atunuu;

E le tatau foi i se Sui Usufono Matua e pei o lau Afioga ona e faapea mai "e asa le faiva ae le asa masalo" i le alofaiva o le Taitaifono o le Komiti Suesue Faapitoa a le Palemene. 0 le galuega tatou te galulue faatasi ma tatalo faatasi iai mo le manuia o Samoa, peitai e matau atu e foliga e faamuamua i lou finagalo faiga faa-Vaega Faaupufai e saili ai se auala e tilofia ai le galuega fita a le Komiti, o le Palemene lava lea. 0 so o se mataupu ua iai se Faaiuga a le Fono Aoao Faitulafono, o tatou uma lava e ana lea Faaiuga. E tatau lava foi ona tatou tausisia ma tapuaia;

Ou te teena lou faapea mai e sui le Taitaifono o le Komiti Suesue Faapitoa o lo o galulue nei i le galuega ua tuuina atu iai e le Palemene. E le tosina gofie sa'u Faaiuga i se mea e le amiotonu ma e solia ai tulaga aloaia o le Fono Aoao Faitulafono. Ou te ofo foi i lou le silafia, e le mafai e le Fofoga Fetalai ona sui se Faaiuga ua uma na ioe iai le Palemene. 0 le Tofiga o le Taitaifono, sa faamaonia e le Fono Aoao Faitulafono. E na o le Fono Aoao Faitulafono foi e faia se Faaiuga faapea i se mafuaaga tatau ua faamaonia e tatau ai ona fai. E le sosofaina foi i sou finagalo toatasi se mea ua ioe iai le Fono Aoao Faitulafono. 0 itu foi ia e atagia ai le le tapena o la outou Vaega Faaupufai i taimi o a tatou taualumaga. Afai sa e toesea, sa tatau ona tou feutagai ma faaleo mai e la outou Vaega ni finagalo faapea i le aso na faatu ai le Lafo. Peitai, ai toeiitiiti uma le galuega a le Komiti, ae o lea faatoa maua sou finagalo;

0 lou finagalo e faapea e le agavaa le Afioga i le Sui Fofoga Fetalai i le tulaga o le Taitaifono o le Komiti Suesue Faapitoa, ou te le taliaina. I lo'u tulaga o le Fofoga Fetalai, e agavaa Sui Usufono uma i so o se tofiga e faamaonia e le Maota. E augata tele lo'u tagata e fai se faamasinoga sese e faasinosino lima ai i Sui Usufono Mamalu e faapea, o ai ua agavaa, a o ai e le agavaa. 0 Tofiga uma e mai le Atua. E agavaa uma foi so o se tagata ua tofia ma filifilia e le Atua i so o se Tofiga ua ia finagalo iai. A o lo tatou tiute e fai faatasi, o le tatalo mo so o se valaauina;

E lagona lava lo'u faanoanoa i saunoaga tau faamata'u a lau Afioga e faafefe mai ai le Fofoga Fetalai ma le Palemene i le ono oo atu o lenei mataupu i le Faamasinoga. 0 lena ua ou faamanino atu. Ae na ona ou faamanatu atu, ua matua lou soifua i Upufai o lo tatou atunuu. 0 se uiga le faaaloalo lea tulaga. Sa ou manatu tele o lau Afioga e taualamua i le tausiga o le mamalu o le Nofoa ma le Palemene. Peitai, e ese le mea o iai lou finagalo. E le soona faafefeina foi e sesi le Fofoga Fetalai ma le Palemene mamalu ale atunuu. 0 le tuualalo alofa, seu le manu ae tagai i le galu.

Ma lo'u faaaloalo tele

Hon. Papali’i Li'o Oloipola Taeu Masipa'u

FOFOGA FETALAI

Kopi: Afioga i le Tamaitai Palemia

Afioga i le Sui Fofoga Fetalai Afioga i le Loia Sill