Faaalia E Junior Paulo Lona Fia Taalo Ai Mo Le Au A Le Pasefika O Loo Fuafua Le N.R.L E Faatu

Junior Paulo

Ata Pueina: Eyespy Radio 87.5 FM

Ua taua e le kapeteni o le Toa Samoa ia Junior Paulo, afai ae taunuu le faatuina lea o se au a le Pasefika e auai i le taamilosaga o le N.R.L, o lo'o iai lona naunautaiga e na te taalo ai mo lea au.

A'o fuafua ai le Taamilosaga Lakapi Liki a Ausetalia le N.R.L e faaopoopo nisi au fou e auai i totonu o lea taamilosaga, o loo iai le avanoa e ono faia ai se au lakapi liki mo atunuu mai i le Pasefika.

O le taimi nei e 17 au o loo iai i totonu o le taamilosaga o le N.R.L, ma e tasi le au fou i lenei tausaga, o le au a le Dolphins lea ua 2 taaloga e lei malolo lava. O le mafuaaga lea ua fuafua ai le N.R.L e fa'aopoopo ni isi au fou e tolu e atoa iai le 20 au o loo fuafuaina e tauva mo le taamilosaga o le N.R.L, ona o le mataina o le tulai mai o lea au fou.

I nisi o lipoti mai i ni isi o ofisa faasalalau a Ausetalia o loo taua ai le ono faatuina lea o se au a le Pasefika e faamautu i totonu o Cairns ma o taaloga o le faia i Samoa, Toga, Fiti, ma Papua Niu Kini. I se tasi o lipoti mai i le ofisa faasalalau o le "Zero Tackle", na taua ai e Junior Paulo lona fia taalo lea mo le au a le Pasefika pe afai ae taunuu lona faatuina.

“Ua matou va’ai i le taamilosaga o le Supa Lakapi poo le Super Rugby i le ‘au a le Moana Pasifika, ma ou te iloa o loo mananao foi tagata o le Pasefika i se au faapea mo le taamilosaga a le N.R.L.

“O se ‘au Pasifika ose mea ua leva ona matou moemiti iai, aemaise lava i le mae'a ai taumafaiga manuia a le Toa i le Ipu a le Lalolagi, ma i nai tausaga ua mavae na ou vaaia ai nisi o uso mai i le Pasefika ua mitamita e avea i latou ma avefua mo atunuu ma tagatanuu o le Pasefika.

O le taimi nei, e 45% o tama taalo o loo i totonu o le taamilosaga o le N.R.L e iai tupuaga mai i atunuu o le Pasefika. Ma na taua foi e se tasi o sui mai i le au a le Mate Ma'a Toga ia Will Penisini e mautinoa o le a fia taalo uma i latou i se au a le Pasefika pe a fausia.

“Ou te manatu o lea ioe tagata taaalo (mai Pasifika backgrounds) o le a tuu i luga o latou lima,” o le tala lea a Penisini.