Toalima Sui Mai I Le Matagaluega O Leoleo Ua Faau'uina Mai I Le A.P.T.C

Toalima Sui Mai I Le Matagaluega O Leoleo Ua Faau'uina Mai I Le A.P.T.C

Ata Pueina: Facebook

O le aso ananafi na faatautaia ai le faau'uga a le aoga faamatataeseese o le A.P.T.C lea e 217 i latou na tauaaoina tusipasi, ma e toalima ni sui mai i le Matagaluega o Leoleo na faauuina ma tauaaoina a latou tusipasi i le mae'a ai o le latou malaga faaleaoaoga. O le faauuga sa fuafua e faatautaia i le tausaga ua mavae ae peitai e lei mafaia ona faia ona o vavao o le Koviti19.

O malu o le malo e toalima sa mafai faauuina ma tusipasi (Certificate IV of the Leadership & Management Course), o Civillians Meriseleisa Maiava, Wendy Usoalii Paulo, o le Satini Sinia ia Florence Toilolo, ma Richard Stowers. O le tamaitai o Aigagalefili Tapuai mai i le Ofisa o Leoleo i Tuasivi i le motu tele i Salafai na mauaina le tusipasi o le Certificate IV in International Skills Training.

I se pepa o faamatalaga mai i le Matagaluega o Leoleo, na taua ai e se tasi o tamaitai malu o le malo na faauuina ia Wendy Usoalii Paulo, "E tele le aoga ma le taua o le course sa ou tauaveina i lo'u galue ai i totonu o le Matagaluega, ua faaleleia atili ai lo’u gafatia e taitai ma pulea.”

Na ia taua foi o le faigamalaga faaleaoaoga i le mea ua i ai nei o le taunuuga lea o nei kosi, fai mai ua mamanuina ma suia ai lona siosiomaga faigaluega ma oute faafetaia le Atua mo le tatalaina o avanoa mo ia ma ana paaga e faamalosia ai o latou gafatia i le faatinoga o galuega.

O le afioga i le Komesina o Leoleo ia Auapa’au Logoitino Filipo ma le sui komesina ia Lafaitele Herbert Aati sa i ai i le au valaaulia sa molimauina le sauniga o le faauuga sa faia i le faleta’alo a le Iunivesite Aoao i le Aso Tofi o le vaiaso nei.

Na fa’afetaia e le Komesina le i latou e toalima sa faauuina ua ausia ma fa’ailoa lo latou naunau e fa’alautele lo latou agava’a.