Fiafia Fanau Aoga O Mulivai Safata Ua Fausia Fola Fou O Potu Aoga

Aoga tulagalua i Mulivai Safata.

Ata Pueina: Amepasa o Siamani

Ua faatupeina e le Amepasa o Siamani i Ueligitone se galuega faapaaga ma le aoga tulagalua i Mulivai Safata e faaleleia ai tulaga o a'oa'oga mo lenei tausaga. O le faamoemoe o lenei galuega o le saunia lea o le fola o le fale mo potu aoga ma le hall a le aoga.

Mo lea galuega, na foa'i mai e le Amepasa Siamani i Ueligitone e silia ma le $16,000 Tala Samoa le tau o le fola o le fale ma le falea'oga mo le aoga.

O le Amepasa ia Beate Grzeski, o ia o le Sui Fa'apitoa mo Setete o le Pasefika o lo'o fai ma sui o Siamani, na ia fa'amatalaina le taua o lenei poloketi. 

"I lenei tulaga o le maeʻa lea o se poloketi e faʻaleleia ai le aʻoaʻoina ma tulaga tumama e ala i le faʻapipiʻiina o fola o le faleaoga. O lea ua matou mautinoa ai se siosiomaga sili atu i potuaoga mo le manuia o tamaiti aoga ma faiaoga”saunoa ai Beate.

Faaalia e Luisa Malele le peresitene o le komiti o Aoga Tulagalua i Mulivai.

“Ua tele tausaga o faatu le aoga, ua fai si tele o le leaga o le tau e aofia ai ma le afa ma e lei tasi lava se fesoasoani na aapa atu i lea ituaiga o foai. O lenei poloketi na fesoasoani tele i le aoga aemaise o le tumama lelei mo tamaiti aoga. Ae matou te le'i amataina le galuega, e masani ona palapala toniga a tamaiti pe a uma le aoga ma o potu e matua palapala ma pefu." saunoa ai le peresitene. 

Na fa’aopoopo mai fo’i e le Pule a’oga, le afioga ia Lutia Taupale Sialofi, “O lenei poloketi e fesoasoani tele i le a’oa’oina o le aoga aemaise fanau o loo a'otauina iinei.O tamaiti o loʻo aʻoaʻoina i le siosiomaga mama e taʻitaʻia ai le mafaufau i mea sili ma lelei".