FA'ALAUILOA MAILEI FOU MO LE TAPUEINA O PUAA AIVAO

(Ata Pueina: Supplied)

O le taeao o le Aso Lua o le vaiaso nei i le Apita o Pisaga Hall i Salelologa na fa'alauiloa aloaia ai e le Matagaluega o Fa'atoaga ma Faigafaiva ni mailei fou mo le tapueina mai o pua'a aivao po'o meaituaolo o lo'o fa'aleaga ma faatama'ia le tele o maumaga a le aufaifaatoaga.

O pua'a aivao latou te fa'aleagaina fa'atoaga aemaise lava le talo i nei i Samoa, ma ise ripoti lata mai a le matagaluega o lo'o maitauina ai le fa'atuputupulaia pea o le fuainumera o nei manu faalafua.

 O lea tulaga e a'afia ai le alagaoa a i latou o lo'o fa'amoemoe i maumaga e tausi ai aiga, fa'apea fua o faatoaga mo le auina atu i maketi i fafo.

O le mafuaaga lea na galulue so'oso'o tau'au ai le matagaluega ma le ofisa o le SROS (Scientific Research Organization of Samoa), MDF (Market Development Facility), ma le FAO (Food and Agriculture Organization) e sailia ni fofo ma ni metotia e foia ai lea faafitauli o pua'a aivao.

Na taua e le Minisita o Fa'atoaga Faigafaiva ma le Vaomatua, afioga Polataivao Fosi Schmidt, o loo i Samoa nei ni sui e toalua mai i le kamupani o le Pig Brig Traps Systems i Texas Amerika, e fa'alauiloa nei mailei fou o le a fa'ataitai tapue ai pua'a aivao.

"O le natura o le manu lenei o le pua'a, o se manu e atamai toe vave lana maitau. Ma o le itu faigata lea sa iai ao faaogaina mailei tuai e pei o le eli o lua e tapue ai, ona e poto le puaa e alo ese mai ia mailei.

"Ae o mailei fou la nei e maualuga le avanoa e tapueina mai ai le tele o puaa aivao," saunoa mai lea a Laauli.

E 10 mailei ua iai nei, ma e lima ua fuafua mo Savai'i a'o le isi 5 e mo Upolu.