MOLIA SE MATAI LEFAGAOALII I LE TAUMAFAI E FA'AO'O LE OTI I SE TAMA 72 TAUSAGA

Aitaui’a Ioasa Lemau ua molia nei i le moliaga o le taumafai e fa'ao'o le oti, ma o lo'o tatala i tua e talia ai le toe valaau o lana mataupu i le Aso 16 o Oketopa. (Fale Faamasino,Ata Pueina: Lars Gustaf Bell/ Eyespy Radio Samoa)

O se tama 70 tausaga le matua mai le afioaga o Lefagaoalii, Aitaui’a Ioasa Lemau ua molia nei i le moliaga o le taumafai e fa'ao'o le oti, ma o lo'o tatala i tua e talia ai le toe valaau o lana mataupu i le Aso 16 o Oketopa.

O lo o tu’uaia fo’i o ia i le fa'ao'o manu’a tuga ma le fa’aa’upegaina i se a’upega mata’utia. O Aitaui’a o se tasi o i latou e to’a 12 mai le afioaga o Lefagaoalii na molia i se faalavelave i le 3 vaiaso talu ai, lea na saisai ai se matai e 72 tausaga le matua i se amo ae ave i le malae o le nuu e faatino ai le faaiuga a alii ma faipule.
Na faaleaogaina le faaiuga a le nuu ina ua tootuli se faifeau ma aioi atu i matai o le nuu ina ia faamagalo atu i lea tama 72 tausaga le matua. 

Mai le to’a 12 o i latou o lo'o molia i lea mataupu, e na o Aitau’ia o loo molia i luma o le Fa’amasinoga Maualuga ona o le matuia o moliaga, ae o isi uma o lo o molia i le Fa’amasinoga Fa’aitumalo i Tuasivi, Savai’i. 

O lea ua tatala ia Aitaui’a i tua, ua poloaina ai loa le tuuina atu o ana pepa malaga uma, e nofo ai i le fale o lona afafine i Tanumapua ma ia saini i le Ofisa o Leoleo i Faleata i Aso Lulu uma seia oo i le aso e toe valaau ai lona faamasinoga.