MOLIA SE ALII UA MASALOMIA NA LAVEA AI LE TAMAITA’I SAINA.

(Ata Pueina: Lars Gustaf Bell/ Eyespy Radio Samoa)

O lo'o ua taofia nei i lalo vaavaaiga leoleo se alii, 38 tausaga mai le Afioaga o Malie, o lo'o masalomia i le faalavelave na maliu ai se tamaitai tagat nu'u Saina i le vaiaso talu ai.

E tusa ai ma ni faamatalaga mai i le Ofisa o Leoleo ma o latou fa’asalaulauga sa faia, ua savali le lua vaiaso talu ona faia nei su’esu’ega. Na saunoa fo’i le Komesina o Leoleo, Afioga ia Auapa’au Logoitino Filipo e tusa ma le fa’alavelave ua savali le lua vaiaso talu ona fa’agasolo latou su’esu’ega.

O lenei tama na faapea sa ia saoasaoa mai ma ia so’a i lenei tamaitai a’o ia savali i tafatafaala o Vailoa i le itu i tai. 

O se ripoti mai i leoleo e fa’apea, o le tele o mau ma tagata sa latou molimauina lenei fa’alavelave, na latou fesoasoani tele i le galuega a le Ofisa o Leoleo a’o faia su’esu’ega. Sa su’esu’eina ma fa’atalatalanoa foi e Alii mamalu o le malo, aiga o lata ane i le mea sa tupu ai lea fa’alavelave.

Peita’i, e le’i maua lava o ia ma e na te le’i fa’ailoa fo’i i le Ofisa o Leoleo, e tusa ai ma ona soligatulfono.

O le fesoasoani tele ua mafai ai ona tu’ufa’atasia lenei su’esu’ega, o mea-pu’e-ata (camera footages) o pisinisi latalata ane ma pisinisi na pasi a’e iai i luma lenei ta’avale a’o saoasaoa atu e sola. 

O le vaiaso foi ua mavae, na fa’asalalau ai e le itulau a le Ofisa o Leoleo i luga Upega tafailagi le igoa o le ituaiga taavale o le sa ia so’aina lenei tina/tama’ita’i Saina. 

O lo’o nofo va’ava’aia lenei Ali’i e leoleo, e fa’atali ai le aso e tula’i ai o ia i le Fa’amasinoga maualuga e tali ona moliaga. O le aso 16 o Oketopa 2023, e tula’i ai o iai i luga o le fa’amasinoga maualuga ma tali ai ana moliaga.