MANUIA LE TAPUEINA O MEAITUAOLO E LE MATAGALUEGA O FA'ATOAGA
(Ata Pueina: MAF)
O le vaiaso ua mavae na maua mai ai ni meaituaolo po'o ni pua'a aivao e 8 mai ni mailei se 2 na faatuina e le Matagaluega o Fa'atoaa i le afioaga o Sapapali'i ma Satufia i Satupaitea.
O lea poloketi na afua ona o se tasi lenei o manu o lo'o fa'aleagaina ma fa'atamaia maumaga ma fa'atoaga a le aufaifaatoga.
O le 2 vaiaso talu ai na auaina mai ai i Samoa nei e le matagaluega sui e toalua mai i le kamupani fai mailei o le Pig Brig Trap Systems i Texas e aoaoina sui o le matagaluega i le faaogaina o nei mailei faapitoa e tapue ai pua'a aivao.
Na saunoa mai le ali'i minisita, afioga Laaulialemalietoa Polataivao Fosi Schmidt, "O pua'a aivao ua avea nei ma fili numera tasi o le aufaifaatoaga ona latou te faaleagaina maumaga taalo, ufi, ma taamu o lo'o totoina mo le auina atu i maketi i fafo.
"O metotia sa faaogaina e le tele o le aufaifaatoaga e aofia ai lua, o nusi poo maea, fapea le toto latalata lea i tafafale o maumaga ina ia faigofie ona vaai mai i le faaleagaina e meaituaolo.
Na ia saunoa foi o le kamupani o le Pig Brig Trap Systems i Amerika na fausia ia mailei, ma e $15,000.00 tala le tau o le mailei e tasi.