Faatautaia E Le Lakapi Samoa Se Polokalame Mo Tamaitai

Women in Rugby

O le aso ananafi na faatautaia ai se polokalame a le faalapotopotoga o le Lakapi Samoa ma lana paaga, le Matagaluega o Tina ma Tamaitaie taua o le Womens Rugby Forum. O lea polokalame na talanoaina ai le taua o le avanoa tutusa o tamaitai ma alii, faia o faaiuga talafeagai i tua ma taimi o taaloga, faapea le unaia lea o le auai o tamaitai i totonu o soo se itu tau taaloga.

O lea polokalame sa faagasolo na faamanatu ai foi le ogaoga o aafiaga o sauaga agai i tamaitai, ma ua ogatasi lea ma le faalauiloaina foi o le "16 aso o le tetee atu i sauaga" o loo faamanatuina i lenei vaiaso. Na maua ai foi ma ni aoaoga i le avea lea o tamaitai o ni taitai i totonu o totino taalo mo e uma na auai i lea faamoemoe.

Na taua e le sui ofisa o le "Get into Rugby Plus" ia Seleagaia Alapati, na te talitonu o lea polokalame o le a aoaoina ai tamaitai sa auai i le faia lea o faaiuga tatau e le gata i le taimi o faatino ai taaloga ao le taimi foi ua maea ai.

"O loo matou taumafai ina ia maua e tamaitai se siosiomaga saogalemu ma se siosiomaga e maua ai le aiatutusa o tamaitai ma le itupa o alii,"

"O lea polokalame o le a faaaupegaina ai foi tamaitai ina ia iloa a latou aiatatau, ma ia o latou iloa ai foi o loo lagolagoina i latou."

Na ia saunoa foi o se tasi foi o anavatau o lea polokalame o le taumafai lea e faamalamalama tagata i le taua o le auai o tamaitai i soo se taaloga poo se faalapotopotoga.

O lea polokalame sa mafai on faatautaia ona o le lagolago malosi a le Ofisa o Malo Au Faatasi (UN Women), Matagaluega o Tina ma Tamaitai, ma o loo taumafai pea nei faalapotopotoga eina ia unaia le auai o tamaitai i totonu o taaloga.

Na ta'ua e se tasi o tamaitai na auai i lea polokalame, Maria Ereinei nikolao, e tele le taua ma le aoga o lea polokalame na ia auai ai.

"O lenei polokalame e tele tele lona aoga, ma o loo aoaoina ai i matou (tamaitai) e faalauaitele le taleni i soo se taaloga,"

"Ou te fautua atu foi i nisi o uso o iai le taleni ma le agavaa ina ia faaoga aua na foai mai e le Atua," na ia taua. O maria e mai i alalafaga o Puapua, Fagaloa ma Fuailalo. Sa taalo o ia i le 'au Under-20 a Samoa ma sa taalo foi i le au lea na taaalo ma Niu Sila i le tausaga nei.

O le tatalo a faalapotopotoga na faatautaia lea polokalame, ia maua uma e i latou sa auai malamalamaaga e taofi ai faiga le talafeagai agai i tamaitai i totonu o soo se asosi taalo i Samoa nei.