Filifilia Scott Robertson Ma Faiaoga O Le All Blacks

Filifilia Scott Robertson Ma Faiaoga O Le All Blacks

Ata Pueina: Facebook

O le o loo avea i le taimi ne ma alii faiaoga ulu o le au a le Crusaders i le taamilosaga o le Supa Lakapi ia Scott Robertson ua filifilia nei e avea ma faiaoga ulu o le au a le Olo Peleki (All Blacks).

O le susuga ia Scott Roberts ua 48 nei ona tausaga ma na tofia o ia e galue i lea tofiga mo le tausaga a sau i le mae'a ai o le faagasoloina o le filifilia o se faiaoga mo le All Blacks., ma o loo talia le faailoa ai lea e Robertson i latou ua ia sauni e tofia i ni isi o tofiga fa'afaia'oga lagolago.

Ua tofia Robertson e avea ma faiaoga o le All Blacks mo le fa tausaga, mai le 2024 se ia o'o atu i le faaiuga o le Ipu Lakapi a le Lalolagi i le 2027, ma o le a suitulaga i le faiaoga ulu o Niu Sila i le taimi nei ia Ian Foster, lea o le a ia taitaia le au a le All Blacks i le Ipu o le Lalolagi lea o le a faatauaia i totonu o Farani i le tausaga nei.

O Robertson ma le faiaoga ulu o le au a Iapani i le taimi nei ia Jamie Joseph na apalai uma e fia avea ma faiaoga o le All Blacks, ma o i laua e toalua na faafaigata ona faia i ai le filifiliga a le New Zealand Rugby.

Peitai, na tofia e le New Zealand Rugby (NZR) Robertson ona o le eseese o ana metotia ma auala fou i le faatinoga o le taaloga, faapea foi lona naunau ia toe siitia i le tulaga muamua le All Blacks i le faatulagaina o au lakapi a le lalolagi.

Ina ua faasalalau le tofia ai lea o Robertson e avea ma faiaga ulu a le All Blacks e ofisa faasalalau a Niu Sila i le aso ananafi, na faaalia e le sa avea muamua ma faiaoga a Niu Sila ia Steve Hansen i se faatalatalanoaga ma le Newstalk ZB, e ui o Robertson e lei galue muamua o se faiaoga mo se au faavaomalo, ae na ia taua e na te talitonu o le a lelei le tulai mai o Robertson.

"E tusa lava po o ai e avea ma faiaoga o le All Blacks, matou te lagolagoina. O le taimi lenei o Robertson, ma e matou te lagolagoina foi lea faaiuga,"

“O sui uma e lua sa i ai faamaumauga mataʻina ma e lelei tele i laʻua i le puleaina o tagata."

"Ia te aʻu lava ia ou te manatu e leai se eseesega. Sa taalo i fafo, sa faiaoga i fafo, e le o faavaomalo, ae o loo faiaoga iinei i Niu Sila ma o se tagata Niu Sila e tatau ona faiaoga. O fa'amaumauga o ana galuega o loo tau mai ai o ia o se faiaoga lelei. O lea ia tatou talia ma vaavaai po o le a le mea e sosoo ai,” o le saunoaga lea a Hansen.

Na faailoa foi e se tasi o alii e iai lona tupuaga Samoa sa taalo foi mo le All Blacks i nai tausaga ua mavae ia Sonny Bill Williams lona lagolagoina o Robertson e ala i se feau tusitusia i luga o le Twitter na ia faamanuia ai ia Robertson ona o lona mauaina o le tofiga.

E ui o le a faamavae ese mai Robertson mai i le latou au, ae na faaalia pea e le pulega o le au a le Crusader le fiafia ma le lagolago mo le susuga ia Robertson ona o lea la'asaga fou ua ia ausia.