Maliu Se Tamaititi A'oga 6 Tausaga Ona O Le Ave Taavale Faatamala

Ata Pueina: Anetone Sa’aga/ Eyespy Radio

E 59 tausaga le matua o se tama ua molia nei e le Matagaluega o Leoleo ma Falepuipui ona o le ave taavale faatamala lena na i'u ina maliu ai se teineititi ā'oga e 6 ona tausaga.

Sa ta’ua e le Komesina o Leoleo le Afioga ia Auapaau Logoitino Filipo , o lenei faalavelave na tupu i le Aso Faraile o le fa'aiuga o le vaiaso na mavae atu nei. E talitonu o le faalavelave na tulai mai le afio'aga o Mulivai, Safata.

Sa ta’ua e le alii Komesina e faapea na aafia lenei alualutoto i le taimi na tuua ai le aoga , ina ua faapea ona aga'i o ia i le fale. O le ua maliu, na taumafai e kolosi i le isi itu o le auala lea na aafia ai loa ina ua so'a(tulou) o ia e le taavale.

Sa faapea ona auina atu lona tino mo ni togafitia vave i le Maota gasegase i Motootua , ae peita'i ua maliu lava o ia ona o le tūgā o ona manu'aga. Ua siitia mai nei moliaga o le ave taavale mai le ave taavale faatamala e faaooina ai manu'aga i le ave taavale faatamala faaooina ai le maliu.

O lea tulai nei le avetaavale 59 tausaga lona matua i le ofisa o Faamasinoga i le masina fou e tali i ona moliaga.

O loo tuualo mai nei le Matagaluega o Leoleo ma Falepuipui i le mamalu o le atunuu ina ia utagia auala saogalemu mo fanau ā'oga. Ma fautuaina matua ina ia o latou utagia le pikiina ma le momoliina o fanau aoga aua le saogalemu o fanau.