Molia Se Alii 30 Tausaga I Lona Tuuina O Se Fualaau Faasaina I Totonu o Se Mea Inu

Ata Pueina: Facebook/ Supplied

Ua taofia nei e leoleo se alii e 30 tausaga le matua ina ua ia tuuina se fualaau faasaina i totonu o se apa pia sa taumafa e le alii ia Aiden Sagala lea na i'u ai lava ina maliu o ia. 

O le masina nei o Mati na pu’e fa’apagota ai lē ua molia i le Malaeva’alele a Aukilani ma o lo’o i luma o le Fa’amasinoga i Aukilani lona mataupu, e tusa ai ma lipoti mai Ofisa o leoleo i le aoauli o le Aso Tofi o le vaiaso nei. 

O lo’o su’esu’eina fo’i e Leoleo, pe ono afaina ai le vaila’au o le vasega-A (Class - A Drug) i le apa pia , ma mafua ai le maliu o Aiden Sagala.

Aiden Ma’aseia Iosefa Sagala, 21, tausaga le matua lea na maliu i le amataga o le masina nei o Mati i le falemai i Aukilani. 

I lipoti o le aufaasalalau i Niu Sila (Stuff) , o lo'o faagasolo pea su'esu'ega a foma'i faapitoa i le tino maliu o Aiden Sagala faapea le fualaau faasaina na te le'i iloaina na tuu e le tagata i totonu o lana apa pia. 

Sa taua e leoleo latou te talitonu e le'i tuuina e Aiden se fualaau i totonu o lana apa pia. Sa taua fo'i e le tinā a Aiden e lei faapopolevaleina le latou aiga i le taimi sa ave ai Aiden i le maota gasegase.

Ae ina ua mavae nai aso sa faailoa ai e le aiga faanoanoaua maliu si o latou alo ia Aiden. Sa taua e tinā o Aiden o lenei uiga na faalia i si ona alo o se aga le alofa , ae latou te faamagalo atu i lenei alii.

 "Ae matou te le faagaloina fo'i lenei uiga ua ia faia" saunoa le tinā faanoanoa. Sa ia tā'ua fo'i o le atalii ia Aden na taunuu o ia i laufanua o Niu Sila i le 3 o ona tausaga ma o se pele fo'i o le latou aiga. 

Tusa ai ma lipoti mai ofisa malu o le malo i Niu Sila e faapea o loo faasolo pea su'esu'ega a le Matagaluega.