IAI LE AVANOA E ONO MISIA AI E JAROME LUAI LE PACIFIC CHAMPIONSHIPS

Jarome Luai (Ata Pueina:Getty Images: Mark Metcalfe)

E iai le avanoa e ono le mafai ai e Jarome Luai ona ta'alo mo le Toa Samoa i le Ipu o le Lakapi Liki a le Pasefika (Pacific Championships 2023) o le a faia ia Oketopa, ona na fa'amanu'alia o ia i le ta'aloga a le Panthers ma le Paramatta Eels i le po anapo (Aso Tofi 24 Aukuso).

O Luai na mafati lona tau'au (dislocated shoulder) i lea ta'aloga na faia'ina ai le Panthers i le Eels i 'ai e 18-32. Na lavea o ia i le afa muamua o lea ta'aloga a'o taumafai agai i le laina sikoa a le Eels, ae pu'e ai loa Luai e Bryce Cartwright ma manu'a ai o ia.

Na fa'ailoa mai e le Faiaoga Ulu o le Panthers ia Ivan Cleary, "E le' iloa tonu pe tuga le manu'a o Romey (Jarome) i le taimi nei. Ae fa'atoa iloa pe a mae'a ona fai lana fa'ata (scan).

"Ae na matou talanoa ma foma'i ma o latou ta'ua mai e iai le avanoa e ono misia ai e jarome ta'aloga o lo'o totoe," o le saunoaga lea a Cleary.

O Luai o se tasi o sui fa'amoemoeina o le 'au a le Toa Samoa, ma e tele lona tomai i le fa'atinoga o le ta'aloga e pei ona molimauina a'o ta'alo ai mo Samoa i le Ipu o le Lalolagi i le tausaga ua mavae sa faia i Egelani.

O le ta'aloga muamua a le Toa Samoa o le a ta'aalo ai ma Ausetalia i le Aso 14 o Oketopa i totonu lava o Ausetalia i le malae o le Queensland Country Bank Stadium i Townsville.

O lana ta'aloga lona lua o le a feiloa'i ai ma Niu Sila i le Aso 21 o Oketopa i le malae o le Eden Park i Aukilani Niu Sila. 

O le Final o lea ta'amilosaga ua atofa mo le Aso 4 o Novema.