FA'ATINO TA'ALOGA AFELETI A KOLISI O LE SONE B

Apia Park (Ata Pueaina: Lars Gustaf Bell/ Eyespy Radio Samoa)

O le Aso Tofi 24 Aukuso 2023 na faatautaia ai ta'aloga afeleti a a'oga o le Sone B. O Maluafou College, Robert Louis Stevenson School, Fa'atuatua Christian College, St. Mary's College, Faleata College, Chanel College, ma Church College Pesega, ma St. Joseph's College na iloilo e sa'ilia se siamupini mo le Sone B i lenei fo’i tausaga.
Na fa'atumulia le malae ta'alo o le Apia Park i fanau aoga, matua fa'apea nisi o le au matamata na auai e fia maiamo ma tapua'ia ta'aloga a le fanau.

O le tausaga lenei ua toe fa’amaite ai e le Ofisa o Aoga Ta’aloga ma Aganu’u lea fo’i polokalame talu mai le tausaga e 2021. Sa le’i fa’ataunu’uina lenei fa’amoemoe I le tausaga ua mavae atu ona o vavao o le fa’ama’i o le koviti-19.
Na fa'amatala e se tasi o sui ta'alo mai i le Kolisi o Sagato Iosefo ia Ricky Ione, o ia fo'i na mua i le Heat 1 mo le tu'uga o le 400M i le vaega o le intermediate boys, "Ua silia ma le fa masina na ou tapena ai mo le tu'uga. Na lagona le faanoanoa i le tausaga ua mavae ona e le'i mafai ona fa'ataunuuina ni ta'aloga mo Sone fa'apea ai le Champ of Champs.
"Ae fa'afetai i le Matagaluega o Aoga Ta'aloga ma Aganu'u ua toe a'e se tofa e toe faia i lenei tausaga ia ta'aloga mo i matou le fanau, aua e le'o tamaiti uma e lelei i le a'oga, o nisi e lelei i ta'aloga," o lana fa'amatalaga lea.
O le aso ananafi na fa'atautaia ai ta'aloga afeleti a le Sone D, ma o le a maua mai i se taimi o i luma se ripoti po'o afea o le a faia ta'aloga afeleti mo le Sone C ma le Sone A.