FA'ATUPU E TAHITI LE VEVESI I LE MAE'A AI O LE TU'UGA VA'A FA'AVA-O-MALO A LE I.V.F

Ata Pueaina: Samoa IVF Va'a World Distance Championships 2023

O le vaiaso ua mavae atu i le Aso Faraile na tula'i mai ai se fe'eseesea'iga i le va o le 'au alo va'a paopao a Tahiti ma le 'au mai i Niu Sila, a'o fa'agasolo ai le sauniga fa'apitoa sa fa'atautaia i le malae o le Friendship Park; e tapunia aloa'ia ai le tu'uga va'a paopao a le lalolagai po'o le I.V.F World Distance Championships 2023.

Na ta'ua e ni isi na molimauina lea vevesi na tupu mai i le va o nei 'au e lua, e fa'apea o le 'au alo va'a mai i le Junior 19 a Tahiti na amataina lea vevesi ina ua o latou fa'atino se fa'ao'ogalima i ni isi o sui o le 'au a le Junior 16 a Niu Sila.

O le tua'a po'o le tina a se tasi o sui o le 'au a Niu Sila na manu'a mai i lea fe'ese'esea'iga. Na vave ona tali ane malu o le malo sa tiute i lea taimi i le Friendship Park, ma ave uma i latou na fa'atino lea tulaga mo suesuega i le Ofisa o Leoleo i Apia.

Na fa'amagalo e le tina na manu'a sui o le 'au o Tahiti na faia lea tulaga, ma ua fa'aui i tua moliaga na fuafua e faia ia i latou.

I suesuega a lau leitio o le Eyespy Samoa e uiga i lea mataupu ua iloa mai ai, o le mafua'aga o lea vevesi na tupu ona o se tasi o tu'uga na le fiafia ai Tahiti ia Niu Sila ona e talitonu Tahiti o i latou sa tatau ona malo, ae na faitio Niu Sila i le Pulega ona sa taia e Tahiti le latou va'a a'o taumafai e liliu agai i le tini.

O lea na fa'aleaogaina ai e le Pulega le mua a Tahiti, 'ae tu'uina atu le manumalo ia Niu Sila. O le mafua'aga lea na le fiafia ai Tahiti ma o latou fa'atupu loa le vevesi.

I se fa'atalalanoga a le Eyespy Samoa ma le sui o le I.V.F ia Su'a Jay Ah Fook, na fa'aalia ai lona fa'anoanoa tele i le 'au a Tahiti ona o lea tulaga le tautamalii sa o latou faia i le 'au a Niu Sila.

"E lagona lava le fa'anoanoa i le 'au a Tahiti ona o lea tulaga le manaia na o latou fa'atino. O le taimi nei o lo'o talanoaina e le laulau a le I.V.F po'o le a se tulaga e tatau ona fa'asala ai Tahiti, ma e ono fa'aletonu ai le letaou auai ai i ni isi o tu'uga fa'apenei o le a fai i le lumana," o le saunoaga lea a Su'a.