GAOIA SE CONTAINER I'A I LE UAFU I MATAUTU

Ata pueina: Facebook

O le Aso Faraile o le vaiaso ua mavae i le uafuu fa'ava-o-malo a Samoa i Matautu, na gaoia ai e ni isi se container i'a ua mae'a ona tapenaina mo le auina atu mo maketi i fafo.

I se pepa o fa'amatalaga na tu'uina mai e le Pulega o Uafu a Samoa (Samoa Ports Authority), na taua ai e toasefulumaleono (16) leoleo po ua fa'amalolo nei i le masalomia o lo'o a'afia i lea gaioiga fa'asolitulafono.

Na taua foi, "O lea mataupu ua taulimaina e le Matagaluega o Leoleo ma o lo'o fa'atino ai suesuega ina maua uma i latou sa faia lea solitulafono. O le mulimuli faia se isi fa'ai'uga pe a maua le taunu'uga o suesuega a leoleo.

"Ona o lea tulaga na taua i luga, ua faatinoina ai nei e le Pulega ni suiga fou i tulaga manaomia mo le ulufale atu i le uafu na amata fa'amalosia i le Aso Toonai 19 Aukuso 2023. "O le mea lea, matou te fa'amalulu atu ai mo soo se faafitauli e ono mafua mai ona o nei suiga, ma e matou te faafetai tele atu mo la outou malamalama ma le fesoasoani mai i a matou tiute."

Na fa'afeso'otai e le Eyespy Radio le Komesina o Leoleo ia Auapa'au Logoitino Filipo mo se fa'amatalaga e uiga i lea mataupu. Peitai e le'i manuia.