Lavea Se Pasi I Le Afioaga O Falelima

Lavea mai se isi pasi i le aso (Aso Gafua 13 Mati 2023) i le nuu o Falelima i le motu tele i Salafai.

Ata Pueina: Facebook

I le tuanai ai o ni nai aso talu ona lavea le pasi a le Tuisamau Transport i le afioaga o Sauano i le Itumalo o Fagaloa i le faaiuga o le vaiaso ua mavae, ao lea foi ua toe lavea mai se isi pasi i le aso (Aso Gafua 13 Mati 2023) i le nuu o Falelima i le motu tele i Salafai.

O lea pasi e mai i le falepasi o le Lady Samoa Transport i Asau, ma sa malaga mai Salelologa e agai atu i Asau ae tupu loa lea faalavelave. O ata o le pasi ua matuā faaleagaina na tuuina e nisi o molimau i luga o le Facebook.

O le tagata na tuuina nei ata i luga o upega tafailagi sa le manao e ta'ua lona suafa, ae sa ia faapea mai o le saosaoa tele o le pasi ina ua oo i se pioga i Falelima na mafua ai ona lavea.

Sa ia ta'ua foi sa i ai ni pasese i luga o le pasi ina ua lavea, ae o le mea e laki ai e leai se tasi na maliliu ona o lea faalavelave.

"O nisi o i latou (pasese) sa i ai ni osiosi laiti ae o le mea e faafetai ai e leai se tasi na maliu," o le tala lea a le molimau.