Fesoasoani Le Malo O Saina I Le Aufaifaatoaga A Samoa

Ata Pueina: M.A.F

O loo talimalo Samoa i ni tagata tomai faapitoa se toatolu mai i le Malo o Saina ua malaga mai i Samoa nei e fesoasoani lea i le unaia o atinae tau faatoaga ma faigafaiva a Samoa i lalo o le polokalame ua faaigoaina o le Samoa China Agriculture Technical Aid Project po'o le S.C.A.TA.P.

Na faafeiloaia e le Minisita o Faatoaga ma Faigafaiva (M.A.F.), Laauli Leuatea Polataivao Fosi i latou e toatolu lea o le a iai i le atunuu mo le isi tolu (3) masina aua le tapena ai o le atunuu mo le Vaega VI o lea poloketi o le S.C.A.T.A.P.

O le a fesoasoani i latou e toatolu nei i le fausiaina o avanoa aʻoaʻoga e faʻamamafa ai faigafaiva, meaʻai ma galuega faʻafomaʻi e tusa ai ma le saunoaga a La'auli.

Saunoa le Minisita, o le iai o i latou nei i Samoa o le a maua ai foi ni taunuuga taua mo le galuega ma e matua taua tele mo le isi vaega o le a faagasolo o le poloketi.

Faaalia e le Minisita o suesuega o le a faia mo le isi tolu masina o le a mafai ai ona latou mamanuina le vaega lona ono o le poloketi.

O i latou na faimalaga mai e aofia ai Polofesa Xiang Jin Fu (Food Science & Technology), Polofesa Wang He (Fisheries), ma Dr. Binghua Zhou (Veterinary).

O le aumalaga mai Saina ma le S.C.A.T.A.P. o loo taitaia e Dr. Jim Liu ma o le amataga o le vaiaso nei na feiloai ai e le gata i le Minisita ae o le Ofisa Sili o Pulega (C.E.O.) a le M.A.F ia Tilafono David Hunter, ma le Minisita Lagolago o le Matagaluega ia Maiava Fuimaono Tito.

O le poloketi o le S.C.A.T.A.P. na amatalia i le 2010 e fesoasoani lea i le aufaifaatoaga a Samoa aua le faaleleia atili o faamanuiaga e ala mai i fua o faatoaga, faapea foi le faateleina o tupe maua a le aufaifaatoaga.