Nofo Taofia Bainimarama I Le Toese Mo Le Po E Tasi

Frank Bainimarama

Photo: A.F.P

O le taeao nei o loo faamoemoe e tulai ai le sa avea ma alii palemia muamua o Fiti, Frank Bainimarama mo se iloiloga faapitoa i luma o le faamasinoga i Suva, ina ua uma ona nofo taofia ai o ia i le sela a le Ofisa o Leoleo i le po atoa faatasi ai ma se tasi sa avea muamua ma Komesina o Leoleo a le Malo o Fiti ia Sitiveni Qiliho.

Na molia i laua i le moliaga e tasi, o le faaaoga sese lea o a la tofiga. Na loka i laua ina ua mafai ona fa’atagaina e le Fa’atonusili o Moliaga a le Malo (DPP) Christopher Pryde i le aso Tofi na te’a nei le faatinoina o lea itu.

E faapea na faalavelave Bainimarama ma Qiliho i se suesuega a leoleo e faatatau i se mataupu na gaoia pe faaoga sese ai ni tupe a le Iunivesete o le Pasefika i Saute i le fa tausaga ua tuanai.

Na taua e le Sui Komesina o Leoleo (ACP) Sakeo Raikaci, o lo o taofia i laua i le toese a le Ofisa o Leoleo i Totogo, ma o le a ave i le Fa’amasinoga i Suva i le itula e 8 i le taeao nei.

Na taua foi e Pryde, o le sa avea muamua ma Palemia ma le sa avea ma komesina o leoleo ua faamalolo lē tumau ona "ua tuuaia i le soona fai ma le faaaoga sese o le pule a o laua ofisa, na faamuta ai se suesuega a leoleo".

I le mae’a ai o le taofia o Bainimarama ma Qiliho, na tu’uina atu ai fo’i e leoleo se fa’amatalaga i tagatanuu uma o Fiti e aua le popole ma tausi pea le filemu.

“E leai se mafuaaga e popole ai i le saogalemu o tagata lautele,” o le saunoaga lea a le alii leoleo ia Livai Driu, ma faaopoopo mai e faapea, “o le tulaga saogalemu o le atunuu o loo tumau pea."

“E le tatau ona popole se tasi i le saogalemu o lo tatou atunuu, ona o lo o pulea e Leoleo mea uma, ma e matou te una’ia tagata uma ina ia fa’agasolo a latou galuega e pei ona masani ai."