6 Tino Maliu Amatalia Suesuega Faapitoa
Ata Pueina : Facebook / Supplied
Tuufaatasi ina : EyeSpy Radio 87.5
E 6 ni tino maliu ua leva ona taligā o latou taotoga faapitoa i le maota gasegase i Moto'otua. Ae o le vaiaso nei o lo'o faaauau ai faagasologa o su'esu'ega a le alii foma'i su'esu'e lea na malaga mai Fiti.
Saunoa le Afioga le Sui Komesina ia Papalii Monalisa Tiai Keti o le vaiaso fo'i nei o loo fuafua e mā'ea ai suesuega a le alii foma'i lea na amatalia ona galuega i le Aso Toonai i le vaiaso ua mavae.
O lo'o maitauina o nei tino maliu e 6 e aofia ai le tino maliu o le tamaitai faasalalau ia Aoteroa Pesamino Mayer , le alii pagota ia Kolani Jnr Lam faatasi ai ma le tino maliu o le tamaitai leoleo ia Mele Lapana lea na maliu i le vaitaimi o aso fiafia i le tausaga 2022.
O nei mataupu tau tino maliu e 6 e aofia ai ma nisi tino maliu e le'i mautinoa le mafu'aga o le oti. Lona uiga e le'i maumautūtū lelei ia faamaumauga ma suesuega a Ofisa o Leoleo ma le Ofisa o Faamasinoga i nei mataupu.
E ui ina fa'aopopo le fuainumera o'i latou sa auina o latou tino maliu i le falema'i faapitoa (Post Mortem) ae o lo'o faagasolo pea su'esu'ega a le alii foma'i i tino maliu e 6 mo le taimi nei.
O le mataupu i le tamaitai faasalalau o le fale televise o le TV3 lea na lipotia mai na maua lona tino maliu i lona maota i Ululoloa i le masina o Ianuari. Sa masalomia e le Ofisa o Leleo o lenei mataupu e aofia ai le solitulafono poo le fasioti tagata faamoemoeina.
O leisi mataupu o le alii pagota ia Kolani Junior Lam lea o loo faagasolo ai nei suesuega o le alii foma'i ona ua masalomia lona pule i le ola i le toese i Tanunamalala i le inuina lea o se vailaau fagavao.
O se tasi o mataupu mai e faaiuga o le tausaga ua mavae lea faatatau i le leoleo tamaitai ia Mele Segisolo Lapana lea na maliu i se aupega malosi (faga) ma masalomia na faaaogaina e lana paaga ia Edward Fanueli ma fa'aoo ai le maliu ia te ia i le Aso 24 o Tesema 2022.
O nei mataupu o loo faapea ona i lalo o su'esu'ega a le alii fomai faapitoa (pathologist) mai Fiti ma o loo talia pea iuga o faamasinoga se'i ma'ea ona tuuina mai lipoti o le mafu'aga o nei maliu ma nisi o maliu o loo taofia pea i le maota gasegase i Motootua.