Masalomia Se Samoa I Le Fasioti Tagata I Galuega Faavaitaimi

Galuega Faavaitaimi ma le ua maliu o Simon Bevers.

Ata Pueina : Supplied

O lo'o faagasolo nei suesuega a leoleo i se alii Samoa e 47 tausaga lona matua na auai i galuega fa'avaitaimi i Niu Sila ,lea o lo'o masalomia na ia fa'aoo le oti i se tāmā 56 tausaga lona matua.

I se faalavelave na tula'i mai le masina o Mati 2022 i totonu o le nofoaga o Hope i Niu Sila , sa mauaina ai le tino maliu o lē ua maliu e suafa ia Simon Bevers. I lipoti e faapea na faaogaina se meatotino ma'ai e faaoo ai le oti a'o moe lenei alii. E le'i mauaina lenei meatotino e o'o mai i le āsō.

Sa faamaonia nei masalosaloga ona o se ofu mafanafana lanu meamata (green jacket) na taatia latalata ane o le nofoaga na tupu ai le faalavelave. I lipoti o le au su'esu'e e faapea o le lima o lea ofu sa maua ai le toto o lē ua maliu. Ma o lo'o masalomia e leoleo sa ofuina e le fasioti tagata faamoemoeina lenei ofu mafanafana.

A'o le faafitauli o lo'o feagai nei ma alii leoleo ona o e to'atolu i latou na nonofo i lenei faleie na maua ai le tino maliu o Simon Bevers. Ma o loo faagasolo suesuega poo ai sa ofuina le ofu mafanafana lea , ae tali uma i latou e leai ma seisi na o latou ofuina ona o le ofu a Simon Bevers.

Mavae le tausaga e tasi e o'o mai le asō ua maua ni faamaumauga fou i suesuega a leoleo. O lenei ofu mafanafana o se meatotino e patino i se alii Samoa e 47 tausaga lona matua ma e to'asefulu lona fanau.

E ui ina maua e alii leoleo lenei faamaumauga fou , e faapea e le'o se mafua'aga malosi e mafai ai ona o latou tā'ua ai lenei alii Samoa o le fasioti tagata i lenei mataupu. O isi alii to'alua ia na toatolu i lenei fale'ie ,lea e 30 tausaga le matutua e faapea na piliaki leisi alii i lea po , ao leisi alii sa matamata lana ata tifaga vave moe i lea po.

O lenei fo'i alii Samoa 47 tausaga , sa faamaonia lona faaogaina o le laau faasaina o le maruana, ina ua faatino suesuega masani o aufaigaluega po'o "drug test". 

O lenei alii 47 tausaga mai le afioaga o Vaotupua i Savaii na faapea na toe malaga mai iinei Samoa i le masina o Me 2022. Ae peita'i e lei toe fia fo'i o ia i galuega fa'avaitaimi i Niu Sila , ma ua tuufesili ai nei leoleo pe aisea ua ia le toe malaga ai i galuega faavaitaimi. 

Ua tu'uina nei e Ofisa o Leoleo i Niu Sila se ofa e o'o atu i le $100,000 mo seisi e mafai ona fesoasoani pe iloa foi ni faamatalaga i lenei mataupu. O loo faagasolo pea suesuega a leoleo i le maliu o le alii ia Simon Bevers.