Masalomia Le Aafia Lea O Se Tamaititi 11 Masina I Le Misela

Falemai i Motootua

Ata Pueina : Eyespyradio 87.5 FM

E 11-masina-le-matua o se alualutoto ua faapea ona faanofoesea i le maota gasegase i Motootua ona ua masalomia lona a'afia ai lea i le fa'ama'i o le misela, ma o lo'o auina atu i Niu Sila samples (toto) o le ua masalomia mo suesuega.

O le tamaitiiti 11 tausaga o lo'o masalomia le maua ai lea i le fa'ama'i o le misela, na auina atu i le maota gasegase i le faaiuga o le vaiaso ua mavae faatasi ai ma nisi tamaitiiti e toalua o loo masalomia le a'afia fo'i i lea fa'ama'i. 

Na fa’amaonia mai e le Fa’atonu Sili o le Matagaluega o le Soifua Maloloina , Aiono Dr. Alec Ekeroma, o lo'o faatali i le taimi nei iuga o samples na tuuina atu i Niu Sila. Ae e lua nisi samples na tuuina muamua, peitai, na faamaonia e le o aafia i le misela (negative).

O le taimi nei, o lo’o una’ia e le Matagaluega o le Soifua Maloloina le tui puipuia o le Misela ma le Rupela i le atunu’u atoa.

O le vaiaso ua tuanai nei na una’ia malosi ai e le Matagaluega o le Soifua Maloloina matua uma ina ia mautinoa le faia lea o tui o a latou fanau mo le Misela, Mumps ma le Rupela (MMR) ina ne’i toe a’afia a latou fanau i le misela.

Na ta‘ua foi e le Matagaluega e maualuga le lamatiaga o le toe pepesi mai lea o le misela ona o mataupu lata mai i Niu Sila ma Ausetalia.

“Faatasi ai ma femalagaiga e le faatapulaaina ma tuaoi tatala, ua tatou i ai i le tulaga maualuga o le lamatia ai lea i le faamai o le misela,” o le tala lea a le Matagaluega.

O lo’o fautuaina e le Matagaluega matua, afai e le o mautinoa le tulaga o tui puipuia o a latou fanau, ona asiasi ane lea i se falema’i lata ane mo se fa’amatalaga.

E to’a 98 fanau a Samoa na maliliu ona o le faama’i o le misela i le tausaga e 2019, ma o loo galue malosi le Matagaluega ina ia puipuia uma fanau a le atunuu mai i lea faamai.