Te'ena E Joseph Suaalii Se Konokarate E Tusa Ma Le $10 Miliona

Joseph Suaalii

Ata Pueina: Eyespy Radio 87.5 FM

Ua te'ena e se tasi o sui o le Toa Samoa lea o lo'o ta'alo ai mo le kalapu a le Sydney Roosters i totonu o le taamilosaga o le National Rugby League (N.R.L) ni ofa poo ni konokarate mai i le au a le South Sydney Rabbitohs ma le au Lakapi Iuni a Ausetalia. I se ripoti mai i le nusipepa o le Sydney Morning Herald, o le a logoina e le pulega a Suaalii le Roosters o loo ia faagaioia se avanoa taalo i lana konekarate e nofo ai i Bondi i le 2024.

O lona uiga o le a auatovaa Suaalii mo le maketi saoloto i le 2025. Ua leva ona tuliloaina e le Iuni Lakapi a Ausetalia le sainia ai lea o lea alii e 19 tausaga le matua, ma le naunau e avea o ia ma fetu mo le au a le Wallabies.

Sa manatu foi le au Rabbitoh e fia faatosina Suaalii, ma na lipotia mai na ofoina atu ia Suaalii se isi tupe e faagasolo ai lea tulaga. Na faaalia e Danny Weidler mai i le alaata o le Cahnnel 9, e tusa ma le $700,000 le tupe e maua e Suaalii i le Roosters i le 2024.

E le mafaatusalia lea tinoitupe na ofa e le Rabbitohs i le seleni na ofa e le Wallabie mo Suaalii. I nisi o lipoti na taua ai na ofa e le au a le Wallabies se konokarate e tusa ma le $10 miliona mo le lima tausaga.

O le faaiuga a Suaalii e nofo i le Roosters mo le isi tausaga e tasi, e le o se matematega lea i fuafuaga a le Lakapi Ausetalia peitai, ona o le a oo mai le Ipu o le Lalolagi mo le Lakapi Iuni i le 2027, o lea e iai le avanoa e ono ofu ai Sualii i le ofu lanu auro mo le au a Ausetalia.