Leva Ona Fuafua Eddie Jones E Toe Fo'i Ia Ausetalia

Eddie Jones

Ata Pueina: B.T

Na faaalia e le ali'i faiaoga fou o le au lakapi a Ausetalia ia Eddie Jones i se faatalatalanoaga ma le Telegraph  Sport i le Aso Sa ua mavae, e silia ma le 14 vaiaso na faagasolo na fetuuna'i ai o ia ma le faalapotopotoga o le Rugby Australia.

Sa ta'ua foi i lea ripoti e fa'apea e fa'atolu ona fono Eddie Jones ma le Iuni lakapi a Ausetalia a'o le'i faailoa le toe tofia  ai lea o Jones e avea ma faia'oga ulu mo le au a le Wallabies.

E leai se umi na fa'amalolo ai Eddie Jones e le Iuni Lakapi a Egelani mai i lona tofiga sa iai, a'o lea ua ia sainia se konokarate e avea ai ma faiaoga ulu mo le Wallabies i le isi 5 tausaga o lumana'i, ma o lo'o taumate le to'atele e iai le avanoa e ono toe feto'ai ai Jones ma lana au tuai i le Quarterfinals o le Ipu o le Lalolagi i le faaiuga o lenei tausaga.

Na feiloa'i Jones ma le ta'ita'ifono o le Iuni Lakapi a Ausetalia ia Hamish McLennan, ma lo latou taitai sinia o Andy Marinos ina ua mae'a ta'aloga e tolu a Egelani i le tausaga ua tuanai lea na manumalo ai foi i le au a Ausetalia i laufanua o Egelani e 35 - 15.

Sa ta'ua fo'i e Jones o le filifilia ai o ia i le tofiga ua iai nei, ua ia sauni ai ma lona tagata atoa e manumalo i le Ipu o le Lalolagi.

"Afai ae malolosi toe soifua maloloina uma la'u 'au mo le Ipu o le Lalolagi i lenei tausaga, ou te mautinoa e mafai ona tatou o i Farani ma soli le lamala e 24 tausaga e le'i toe manumalo Ausetalia i le Ipu Lakapi a le Lalolagi."