Fa'amavae Tafaoimalo Mai I Lona Tofiga

Tafaoimalo Leilani Tuala Warren

Ata Pueina: RNZ

Ua faamavae le tama'ita'i famasino ia Tafaoimalo Leilani Tuala Warren mai lona tulaga o le Faamasino Sili i le Ofisa o Faamasinoaga.

Na fa'aalia e Tafaoimalo i le leitio a le Eyespy e fa'apea ua fa'amavae o ia mai lona tofiga ona o ni mafuaaga e patino ia te ia (personal reasons).

O Tafaoimalo sa avea ma se faamasino o le Faamasinoga Sili o Samoa talu mai le 2016 ma o ia e lona lua iai sui tama'ita'i ua mafai ona umia lea tofiga.

Sa galueTafaoimalo i se vaega faaletulafono ma le faamasinoga tonu o Samoa talu mai le 1998, na muamua i le Ofisa o le Loia Aoao, ma na galue foi i le Ofisa Loia a lona aiga o le Tuala Law Firm.

Mai i'ina na avea ai Tafaoimalo ma Fa'atonu Sili o le Komisi o le Toe Suiga o Tulafono a Samoa i le 2009, a'o le'i tofia ai o ia e avea ma Faamasino o le Faamasinoga Faaitumalo (District Court) ma Faamasino autu i le Faamasinoga mo Aiga ma Faiga Saua i totonu o Aiga.

O Tafaoimalo o se tasi o faamasino autu o e na nonofo i mataupu o le Faavae i le taimi na maea ai Faigapalota Aoao i le tausaga e 2021. O lona aso mulimuli i le Faamasinoga Sili o se Faamasino o faamasinoga a Samoa ua faamoemoeina o le aso 24 o Mati o le tausaga lenei.