Maliu "Pele" Ona O Le Kanesa

Edson Arantes do Nascimento poo le isi ona igoa ua lauiloa ai o ia i le lalolagi, o Pele.

Ata Pueina: Google Image

O le aso ananafi na tuumalo ai se tasi foi o tagata iloga i le ta'aloga o le soka lea e fa'atolu ona ia siia le Ipu o le Lalolagi o le Soka ao taalo ai mo Pasila (Brazil), o Edson Arantes do Nascimento poo le isi ona igoa ua lauiloa ai o ia i le lalolagi, o Pele.

E fa'apea o le mafuaaga o le maliu ai o lea fetu o le soka ona o le fa'ama'i oti o le kanesa. Sa togafitia o ia i le tausaga ua mavae ona o se tiuma (tumor) sa maua i lona tino.

I le masina o Novema o le tausaga nei na toe foi atu ai Pele i le falemai i le faaiuga o Novema o le tausaga nei e toe iloilo lona togafitiga o le kanesa, ae sa iloa ai ua maua ai o ia i se siama e aafia ai mama (respiratory).

O foma'i ma le au tausi soifua a le falema'i o le Albert Einstein i le laumua o Sao Paulo na o latou taumafai e faatino uma tulaga ina ia maua ai e Pele le fiafia o lona loto ao feagai ai ma tiga o lona ma'i. 

O le Aso Tofi lava lea sa maliu ai Pele na tuuina ai i luga o upega tafailagi poo le Instagram e le afafine o Pele ia Kely Nascimento se feau tusitusia (post) e faailoa ai i le lalolagi atoa le tuumalo ai o le a fetu o le taaloga o le soka. 

O lea feau tusitusia e faapea, " O mea lelei uma ua o matou sapi ai ona o au galuega tama. Matou te alolofa pea mo oe e oo i le faavavau. Manuia lau malaga."

Na tusia fo'i se feau tusitusi i le itulau a Pele i luga o le Instagram, lea e faitauina faapea: "O musumusuga ma le alofa na faailogaina ai le malaga a le tupu o Pelé, o lē na maliu ma le filemu i le aso. Ao soifua o ia, sa faafiafiaina ai e Edson le lalolagi i lona atamai i taaloga, taofia se taua, faia galuega faaagafesootai i le lalolagi atoa ma le faasalalau atu o le mea sa sili ona ia talitonu i ai o le fofo lea mo o tatou faafitauli uma: o le alofa. O lona soifuaga ua avea ma se talatuu mo tupulaga o le lumanai. Alofa, alofa ma le alofa, e faavavau."

O Pele na faaigoaina "o le tagata silisili" e le faalapotopotoga soka o le Lalolagi poo le FIFA, ma o ia o se tasi o tagata taalo sili ona faamanuiaina ma lauiloa o le seneturi lona 20. 

I le tausaga e 1999, na tofia ai o ia e le Komiti Faavaomalo o le Olimipeka, ma sa aofia foi o ia i le lisi o tagata e 100 e sili ona tāua i le senituri lona 20. I le 2000, na filifilia ai Pelé e le Faalapotopotoga Faavaomalo o Talafaasolopito o le Lalolagi (IFFHS) ma o se tasi o i latou na manumalo faatasi i le FIFA Player o le senituri. 

O ana sikoa e 1,279 i taaloga e 1,363, lea e aofia ai ma uo, ua toe faatulagaina o se Faamaumauga poo se Matati'a o le Lalolagi o le Guinness. 

E maliu Pele ua 82 tausaga o lona soifua.