Maliu Se Pepe 4 Masina Le Matua Ina Ua Mae'a Ona Fai Lona Tui Puipui.

O se teineitiiti faatoa fanau mai e 4 masina le matua na maliu i le vaiaso na tea nei i le falemai i Motootua, ma o loo suesueina e leoleo lea mataupu i le taimi nei.

I se lipoti a le Matagaluega o Leoelo na taua ai na maliu lea pepe ina ua mae'a ona faia lona tui puipui.

Na lipotia e le falemai i Motootua le faalavelave i leoleo i le Aso Sa ua mavae, e pei ona fa'aalia e le Sui Komesina o Leoleo ia Papalii Monalisa Tiai Keti i le faatalanoaga ma le Eyespy Radio e faatatau i le ma'umau ai o le soifua o lea alualutoto.

Na taua e Papali'i na asia e matua o le pepe le falema’i i Motootua i le Aso To’ona’i na te’a nei mo le faia o tui puipui mo le la fanau masaga e ta’i 4 masina le matutua.

Fai mai matua e le'i fia faailoa o la suafa, ina ua latou taunuu i le fale, na amata ona faataio ma tagi aue le la tama pepe lea ua maliu.

Na toe ave vave o ia i le falemai, ae peitai, na maliu ai lava o ia i le afiafi o le Aso To'ona'i ua tuana'i..

Ua fa’atonuina e le Foma'i Su'esu'e Fa'apitoa i Motootua le Matagaluega o Leoleo ina ia fa'atino su'esu'ega i le tino maliu o le pepe e faamautinoa ai pe o le a tonu le mafua'aga na maliu ai o ia.

E lei tali mai le Faatonu Sili o le Soifua Maloloina ia Aiono Dr. Alec Ekeroma ina ua faafesootai e le leitio a le Eyespy i luga o lana telefoni feaveai.

I se pepa o faamatalaga na tuuina mai e le Matagaluega o le Soifua Maloloina i le Aso Tofi o le vaiaso nei, na ta'ua ai le faia o tuipuipui o lea tamaitiiti i le 14-vaiaso le matua e pei ona faatulagaina i le nofoaga o loo i Motootua a le matagaluega.

Ae i le ono (6) itula mulimuli ane, na aumai ai le pepe i le falemai iona ua o'o o ia i se tulaga tigaina tele.

Na taumafai foma'i sa tiute i lea taimi e togafiti ma fa'aola i le pepe, ae pagā lea na to lana manava ma maliu ai lava.

Na taua foi i le pepa o faamatalaga e fa'apea o tausimaʻi na faia le tui puipui o le pepe na mulimulitaʻia uma tulaga masani e tusa ai ma le faia o tui.

E le o iai ni aafiaga tuga o ni isi pepe na tui i le vailaau lava lea e tasi na tui ai le pepe 4-masina le matua ua maliu.

E silia i le 500,000 pepe ua uma ona fai tui puipui e o’o mai i le taimi nei, ma o lo o soifua maloloina uma i latou, se’i vagana ai pepe fou e to’alua na maliliu i Safotu, ona o le le fa’afefiloiina lelei e tausi soifua o tui puipui.

Ofisa Autu O Le Matagaluega O Le Soifua Maloloina, i Moto’otua

Photo: RNZ