Manumalo Lautimuia I Le Nofoa Mo Vaimauga 3

Lautimuia Uelese Vaai

Ata Pueina : Google Image

O le sui tauva mo le Pati o le Faatuatua i le Atua Samoa ua Tasi (F.A.S.T) ia Lautimuia Uelese Vaai, ua fa’amaonia mai e le Komesina o Faiga Palota, le manumalo ai Lea i le palota laititi mo le itumalo Vaimauga 3 i le Aso Faraile na te’a nei.

O lea fa'aaliga fa'alaua'itele na tu'uina mai ina ua mae'a le faitauga fa'ai'u o fa'ai'uga a le palota i le Aso To'ona'i ua mavae.

O Lautimuia na ta’ita’ia fa’ai’uga mulimuli e 1531 palota na ia maua, e 449 palota na muamua atu i le sui tauva a le H.R.P.P ia Samau Leatigagaeono Solitamalii Timani e 1082 palota.
E 106 palota na maua e le sui tauva tutoatasi ia Feagaimaalii Bruce Toomalatai.

O le aofa'iga o palota aoga na faitauina e 2719 ma e 18 palota le aoga.

O Vaimauga 3 o le lona tolu lea o itumalo palota e to’a 4,781 le aofa’i o tagata palota ma o le fa’ai’uga mulimuli na iloa ai e silia ma le 2,000 tagata palota e le’i faia a latou palota.
O le palota laititi na taloina ina ua tuumalo i le faaiuga o le tausaga talu ai le sa avea muamua ma Minisita o le Kapeneta mo le H.R.P.P, Tapunuu Niko Lee Hang.

O le fa'ai'uga o le faiga-palota laititi ua iai nei ua mautinoa ai ua see atu le nofoa a Vaimaiga 3 i le sui o le F.A.S.T.
O Lautimuia Uelese Vaai ose tagata faigaluega a le malo sa galue i tofiga faauluuluga i matagaluega eseese a le malo ma sa avea ma Pule Sili o le Auaunaga Vaa a Samoa lea sa avea ma faitotoa o seila Samoa ua faigaluega nei i vaa folau ma vaa folau i le lalolagi atoa.