Molia Se Tina I Le Gaoi A'o Faigaluega Ai I Le Faletupe O Le ANZ

Sui Komesina o le Matagaluega o Leoleo ia Papali'i Monalisa Tia'i-Keti

Ata Pueina: Eyespy Radio / Anetone Sagaga

Ua molia nei e le Ofisa o Leoleo se tina e 38 tausaga mai i afioaga o Sato'alepai ma Nu'u-fou ona o lona gaoi a'o avea ai ma tagata faigaluega i le faletupe o le ANZ.

Na ta'ua e le Sui Komesina o le Matagaluega o Leoleo ia Papali'i Monalisa Tia'i-Keti, o lea tina o lo'o ua fa'amaonia lona aveeseina lea o se tino i tupe e tusa ma le $80,000tala.

'Ae o lo'o fa'agasolo pea su'esu'ega a le Ofisa o Leoleo i lea mataupu, ina ia auiliili pe ua na'o le pau lea o le aofaiga sa gaoia, pe e iai fo'i se isi aofaiga e le'i iloa.

O lea tina o le a tula'i o ia i luma o le fa'amasinoga e tali i ona moliaga i le Aso 22 o Tesema, ma o lo'o fa'anofo va'ava'aia o ia i le taimi nei. Ua uma fo'i ona tu'u iai aiaiga ina ia saini i Aso Lulu o vaiaso taitasi ae e lei oo i le aso e tulai ai mo lea mataupu.