SAINIA Le FEAGAIGA MOATA'A MA Univesite O NEWCASTLE

Sainia se maliega a le nu'u o Moata'a ma nisi o fanau aoga mai le
Univesite o Newcastle i Ausetalia.

Ata Pueina: Miss Samoa

Sainia se maliega a le nu'u o Moata'a ma nisi o fanau aoga mai le
Univesite o Newcastle i Ausetalia. O lea maliega e mafai ai e nei
fanau aoga ona suesueina ma faatinoina fa'amaumauga e fa'atatau i
laufanua o lo'o ola ai nei le togatogo.

O le aso Lulu o le vaiaso nei sa faapea na fai ai se ava feiloa'iga e
aloa'ia ai le mafuataga a le afioaga o Moata'a ma nisi o fanau o le
Univesite mai New Castle , ma sainia ai le feagaiga mo lenei
su'esu'ega.

O lo'o nonofo nei fanau i le afioga Moataa, ma o lo'o talimalo le nu'u
e ala lea i fafaga ma talimalo malo Samoa masani. O le 'auga lava ma
le fa'amoemoe o le latou auai mai ona , o Moata'a o se tasi o nu'u i
totonu o Samoa o lo'o ola fa'alafua ai le laau o le togo.

I se fa'atalatalanoaga ma le faipule o le Vaimauga No.2 le afioga ia
Lenata'i Victor Tamapua sa ia fa'ailoa mai ai ua leva ona fuafuaina
le faigamalaga o nei malo. Sa ia fa'ailoa fo'i o se tasi o malaga ale
alii polofesa ia Bill Leggat i le tausaga 2019 ua avea ma mafua'aga ua
toe fia fo'i mai ai lea ali'i ma fa'atinoina ai lenei malaga mo le
Univesite.

Sa iai se talosaga ina ia iai se avanoa e mafai ai ona asia e le
Univesite o Newcastle ia laufanua o Moata'a ma fa'atinoina ai le
su'esu'ega. O se amataga lelei fo'i lea i le faigapa'aga a lea
Univesite ma le afioaga o Moata'a.

I le 'ava o feiloa'iga sa faia i le Aso Lulu o le vaiaso nei , sa
fa'atasi atu ai le Komesina o Ausetalia , le tama'ita'i ia Emily Luck
, o sui mai le Univesite ma nisi o sui mai ii aoga tulagalua o Moata'a
Primary School.

O le taua o lenei su'esu'ega ina ia iloa ai e le mamalu o tagata le
aoga o le fa'asaoina o le la'au o le togo. O lea fo'i vaega e
a'oa'oina ai le mamalu o le atunu'u ma le afioaga o Moata'a i auala e
tausia ma teumalu ai lenei la'au.

Ua fa'afetaia fo'i e le Univesite o Newcastle le afioaga o Moata'a mo
lenei avanoa fa'aauro ina ia amatalia ai le poloketi tausi o le
togatogo. Ua latou talitonu o se amataga lea o se lumana'i manuia mo
Samoa fa'apea ma le afio'aga.