Manumalo Iapani ia Siamani 2-1 i le Ipu o le Lalolagi o le Soka

Manumalo Iapani le 'au malosi a Siamani i 'ai e 2-1 le Taamilosaga o le ipu a le lalolagi o le soka.

Ata Pueina: Fifa World Cup

Ua fa'ato'ilalo nei e le 'au soka a Iapani le 'au malosi a Siamani i 'ai e 2-1 i le mae'a ai o le la ta'aloga muamua o le ta'amilosaga o le Ipu o le Lalolagi o lo'o fa'atautaia i Qatar.

Na muamua tau'ai Siamani i le afa muamua o le ta'aloga. Peita'i, e le'i vaivai ai le osofa'i a Iapani, lea na maua ai a latou sikoa e lua fa'atopetope, ole sikoa na tutusa ai 'ai ile 1-1 i le minute 75 ole ta'aloga, ma le sikoa malo mai i le ali'i o Takuma Asano i le minute lona 82.

Na toe taumafai malosi le 'au a Siamani ina ia toe maua se isi a latou sikoa e fa'atutusa ai 'ai, 'ae e le'i tu'umamaina e le puipuiga a Iapani, lea na i'u ai lava ina uma le taimi ma manumalo ai loa i 'ai e 2-1. 

O le manumalo ai o Iapani ia Siamani o se tulaga e fa'ate'ia ai le lalolagi, ona i nai aso ua mavae sa manumalo ai foi Saudi Arabia i se tasi fo'i o 'au iloga i le lalolagi i le ta'aloga o le soka ia Argentina.

Na ta'ua e le Manager o le 'au a Iapani ia Hajime Moriyasu, o le manumalo ai o le latou 'au ia Siamani, o se tulaga mata'ina tele ma o se taimi muamua lea i le tala fa'asolopito o Iapani ua latou 'ausia ai lea tulaga. 

Na ia saunoa foi o le manumalo ai o Saudi Arabia ia Argentina, fa'apea le latou malo ai ia Siamani, ua iloa ai e le lalolagi e talenia fo'i 'au mai i le atu-Asia i le ta'aloga o le soka.

Na fa'afetaia e Hajime le ta'amilosaga  o le Bundesliga a Siamani lea e to'atele sui o le 'au a Iapani o lo'o ta'aalo ai. Sa taua e Hajime, o lea ta'amilosaga i totonu o Siamani, sa fesoasoani tele i le atina'ega o le taleni a sui o le 'au a Iapani, lea ua i'u ai lava ina malo i se tasi o 'au ta'uta'ua i le lalolagi o Siamani.

I se saunoaga a le ali'i kolokipa a Iapani ia Shuichi Gonda, na ia fa'apea mai ai e 'ese le tulaga ua iai nei le maualuga o le latou taumafaiga, e pei ona manumalo ai ia Siamani. 

Ma e na te talitonu, o le mafua'aga ua ala ai ona manuia le latou ta'aloga ma Siamani, ona o le lagolago o le isi tama ta'alo i le isi tama ta'alo, fa'apea ia ma le galulue fa'atasi.

O le ta'aloga o le a soso'o ai a Iapani, o le a ta'aalo ai ma le au a Costa Rica mai Amerika i Saute.