Sauni Le Atunuu E Talimalo I Le Konoseti O Le Motherland Samoa
Fa’atalanoaga ma tusitala.
Ata Pueina: Eyespy Radio 87.5FM
O lea konoseti o le a faatautaia i le Aso 3 o Iuni ma o le a faamanatu ma faaolaola ai foi ni isi o measina a tagatanuu mai i atumotu o le Pasefika .
O le a faia lea konoseti i le malaetaalo o le Apia Park ma o le a faafiafia ai i lea faamoemoe ni isi iloga mai i le Pasefika i le taleni o le musika e pei o Fiji Veikoso, J Boog, HP Boys, Lisi 4300, Savage, DJ Noiz, Kennyon Brown, Tomorrow People, ma le alii Samoa ia Wayno.
E iai foi ni isi o le au fai musika mai i Samoa nei o le a auai e pei o Mautoatasi & Matalena, Zipso, ma le faili o le Pacific Love.
Na taua e Wayno i se pepa o faamatalaga e faatatau i lea faamoemoe, "Ua faatumulia ita i le fiafia ona o lea o le a ou toe fo'i i lo'u atunu'u e faafiafia mo o'u tagata. Ou te mitamita o a'u o se tagata Samoa, ma ole a avea lea konoseti ma auala e faamaopoopo ma fealofani ai tagata Samoa uma."
I le saunoaga a le Minisita o le Ofisa o Turisi ma Tagata Maimoa mai i Fafo ile fonotaga ma le au faasalalau ma le au tusitala i le Aso Gafua o le vaiaso nei, na taua ai e Toeolesulusulu Cedric Schuster, o le konoseti o le Motherland Samoa e le gata o le a faafiafia ai le mamalu o le au matamata, ae o le a avea foi ma auala e faafetaia ai e le au fai musika le lagolago a nai o tatou tagata.
O lo'o talosagaina e Toeolesulusulu le mamalu o le atunu'u ina ia fesoasoani ma galulue soosoo tauau ma le S.T.A faapea le PacifiCast e faamautinoa ai le leai o se tulaga faaletonu e ono tulai mai i le taimi o le konoseti i le masina fou.
"Faamolemole, aua le malovale i le taimi o le a faia ai lea faamoemoe, ona e fai e le toatasi ae ta'uvalea uma ai le atunu'u atoa. O lea, ia tatou galulue fa'atasi aua le faatautaia ai lea o lea konoseti. O lo'o fapea foi ona auai mai foi le Matagaluega o Leoleo e faatino le puipuiga o le au faafiafia," saunoa Toeolesulusulu.
O pepa matamata ta'atele po'o le General Admission e leai se totogi ma o le a mafai ona ulufale fua ai sitiseni po'o tagataanuu a Samoa, se i vagana ai pepa matamata o le V.I.P ma le V.V.I.P o lo'o faatau i luga o le upega tafailagi a le kamupani telefoni o le Vodafone Samoa.