ONO FAAMUTA LE AUINA ATU O TAGATA SAMOA MO TOGAFITIGA FA'AFOMA'I I FAFO

Fa'aalia e le tamaitai Palemia e ono taofia le auina atu lea o nai o tatou tagatanuu mo togafitiga i fafo ona o le taugata tele.

(Ata Pueina: Eyespy Radio 87.5)

O lo'o atugalu ma faapopoleina le tamaitai Palemia o si o tatou atunuu i le siitia ai lea o le fuainumera o le fanau ma tupulaga lalovaoa o loo manaomia togafitiga faafomai i atunuu i fafo.

Faaalia e Fiame Naomi Mataafa, o lea tulaga o loo atagia mai ai le faaletonu tele o le soifua maloloina o tagatanuu o Samoa.

Na fa’aalia fo'i e Fiame sa fa’amaonia e le kapeneta le auina atu lea o le 13 o gasegase mo togafitiga faafoma’i i Niu Sila i le vaiaso na te’a nei.

E taugata tele le polokalame o togafitiga faafomai i fafo mo Samoa, ma na saunoa foi le tamaitai Palemia, e ono fa'amuta e le malo le faaauau ai lea o lea polokalame pe afai e faatuputupulaia pea le aofa'i o gasegase e mo'omia pe manaomia nei togafitiga fa'afoma'i i fafo.

E oo mai i le taimi nei e $16 miliona tala le tau atoa o le polokalame mo togafitiga faafomai i Niu Sila mo lenei tausaga faaletupe.