"AUA LE MALOVALE" : Toeolesulusulu Cedric Schuster

"O le a iai foi i le aso o le konoseti le Matagaluega o Leoleo aua le mataituina o ia tulaga uma," saunoa Toeolesulusulu.

Ata Pueaina: Bethel Peato/ Eyespy Radio Samoa

A'o sauni ai si o tatou atunuu e talimalo i le konoseti musika tele ua faaigoaina o le "Motherland Samoa" lea o le a faia i le Aso 3 o Iuni o le tausaga nei i le malae ta'alo o le Apia Park, ua fautuaina ai nei e le Minisita o le Pulega o Tagata Tafafao Maimoa mai i Fafo le mamalu o le atunuu ina ia faaaloalo ma "aua le malovale" i le taimi o lea fa'amoemoe.

I se fonotaga a le Pulega ma ni isi o le au faasalalau sa faia i le fale fono a le Pulega i le Aso Gafua o le vaiaso nei aua le faalauiloaina lea o tapenaga mo lea faamoemoe ia Iuni, na fesiligia ai e le leitio a le Eyespy le ali'i minisita pe ua mae'a ona silasila ona o latou silasila lea i le tulaga o le malu puipuia ai lea o i latou o le a faafiafia i le taimi o lea konoseti.

Na saunoa Toeolesulusulu e fa'apea o le a o latou galulue fa'atasi ma le Matagaluega o Leoleo aua le faamautinoaina lea o le saogalemu o i latou o lo'o atofa e fa'afiafia.

"Aua le malovale. E fai e le toatasi ae ta'uvalea uma ai le atunuu atoa. O le mea lea, faamolemole ia faalia uiga ma amio faaaloalo i le aso o le konoseti aua o lea faamoemoe o le a matamata ma maimoa mai iai le lalolagi atoa.”

"O le a iai foi i le aso o le konoseti le Matagaluega o Leoleo aua le mataituina o ia tulaga uma," saunoa Toeolesulusulu.

O le Motherland Samoa o le a faafiafia ai ni isi iloga mai i le Pasefika i le taleni o le musika e pei o Fiji Veikoso, J Boog, HP Boys, Lisi 4300, Savage, DJ Noiz, Kennyon Brown, Tomorrow People, Wayno, faapea ai ma ni isi.