TO'ALIMA I LATOU UA MOLIA I FUALA'AU FA'ASĀINA

Ata Pueina: Anetone Sagaga / EyeSpy Radio 

E to'atolu ni alii ma ni tama'ita'i e to'alua ua molia nei ona o ni auala fa'asolitulafono e aofia ai fualaau fa'asaina o le 'aisa (methamphetamine) ma o lenei to'alima o lo'o iai ma se tamā matua e 62 tausaga le matua.

Ua fa'ailoa mai e le Sui Komesina ia Papalii Monalisa Ti'ai Keti o se tasi o meatotino na 'aveese mai i lenei osofa'iga e iai ma se la'au malosi e lē faatagaina i totonu o le atunuu. O nisi o oloa e aofia ai paipa e ula ai le 'aisa , marijuana ma 'aisa.

O lenei osofa'iga na taua e faapea , ana le seanoa le galuega fesoasoani ma le taulogologo o le mamalu o le atunuu e le mafai ona faatinoina suesuega a leoleo. E talitonu o le fa'aiuga o le vaiaso ua te'a nei i le Aso To'onai na faia ai le osofa'iga a leoleo ma molia ai nei tagata e to'alima. 

E le'i tā'ua e le Sui Komesina po'o fea le afio'aga na faatinoina ai le osofa'iga ae e talitonu o le uafu i Matautu o lo'o fa'aaualaina mai ai  le tele o nei oloa faasāina i totonu o Samoa. 

Sa fa'alia e le sui komesina sona faanoanoaga tele ona ua aofia ai ma tamaitai i nei soligātulafono. Tusa ai ma lana saunoaga o loo faagasolo pea su'esu'ega o le Matagaluega o Leoleo aua o lo'o vaaia pea le alualu i luga o ni fuainumera o'i latou o lo'o faia pea nei ituaiga solitulafono.