NUMERA TASI "OB-LA-DI OB-LA-DA" I NIU SILA
Ata Pu'eina: Screenshot / Youtube "OB-LA-DI OB-LA-DA" Music Video
Ua avea nei le pese a le alii musika lauiloa ia Sam Chookoon po'o "Mr.Cowboy" o le "OB-LA-DI OB-LA-DA" ma pese numera tasi i se faatulagaga o pese i totonu o Niu Sila (New Zealand Music Charts)e fia faalogo iai tagata. Ua atoa nei le 4 vaiaso talu ona faasalalau lenei pese ae ua ausia le 1.4 miliona le aofaiga o tagata ua o latou matamata i lenei fatuga i luga o le Youtube.
I se tasi o faasalalauga na tuuina mai e le Ofisa Faasasalau o le One News i Niu Sila , na ripotia mai ai e faapea o lenei fatuga na usuina e le alii ia Sam Chookoon na ausia le tulaga muamua i luga le lisi ua taua o le ''New Zealand Music Charts''.
E faapea o le vaitaimi o Aso fiafia i le Kerisimasi ma le Tausaga Fou na lagonaina ai e le to'atele o tagata le fiafia ma le fia faafofoga i lenei fatuga, lea na mafua ai ona ausia e Mr. Cowboy le pese numera tasi (No.1 Song) i lea lisi. O le pese o le "Ob-La-Di, Ob-La-Da" na fatuina e le aufaipese poo le faili lauiloa o le ''Beatles'' mai Egelani i le tausaga 1968.
Ae i le toe usuina o lea pese e le alo o Samoa ia Sam Chookoon na avea ma vaega ua faasiliga ai le fiafia o le to'atele i lana fatuga ona o le ola toe malie.
E tusa ai ma fa'amaumauga o le vitio musika i luga o le upega tafa'ilagi o le Youtube, e to'a 20,000 ia tagata fiafia iai (likes) ae 1.4 Miliona tagata na o latou matamata (views) i le pesepesega.
E to'atele nisi o faamatalaga a tagata sa faapea o lenei fatuga ua siliga atu nai lo'o le faatuga muamua (original song). Ma o le tele foi o le lagolagosua ma nisi o tagata e mulimuli (fans) i le musika a le alii ia Mr.Cowboy na faalia i luga o lenei vitio.
O le alii ia Sam Chookoon poo Mr.Cowboy o se alii na auai i le tauvaga pese a le TV1 Samoa ua faaigoaina o le Star Search ma na aoga o ia i le Kolisi Maualuga o Pesega. E pe a ma le 51,000 tagata o loo mulimuli (subscribers) i le faigamalaga faamusika a lea alii i luga o le Youtube. Ma o se tasi foi nei o ana fatuga ua ausia le maualuga o nisi o ana pese lauiloa pei o le "Grandpa" lea e 3.5Miliona (views) faapea le "E le'o au o se fufulu ulo" e 3.8 miliona tagata matamata (views).