SAUNI VAIMAUGA 3 MO PALOTA LAITI

Ata Pu'eina: Facebook / Ofisa o le Komesina o Faigapalota (O.E.C)

I se tusi saisai na tuuina atu e le Fofoga Fetalai o le Maota, le afioga ia Papalii Lio Taeu Masipau na logoina  ai le Ofisa o le
Komesina o Faigapalota, ina ia faagasolo fuafuaga mo le faatinoina lea o se palota laititi (By-Election) mo le Itumalo Vaimauga 3.

E tusa ai ma le saunoaga o le Sui Komesina o le Ofisa o Faigapalota ia Mauga Fetogi Vaai ina ua latou tapa le tusi saisai mai le Fofoga o le
Maota , i le Aso Lua o le vaiaso nei, sa ia fa’amaonia mai ai o lea ua amata na fa’agasolo tapenapenaga mo le faiga-palota ua fa’amoemoeina.
O le masina o luma nei ia Fepuari ua fuafuaina e faatino ai lenei palota.

I nisi o faasalalauga mai le Ofisa o Faigapalota e faapea o lea tapunia le lola palota o le Itumalo o Vaimauga 3 mo se taimi le tumau
, seia maea ona faagasolo le faigapalota laititi. E tusa ai ma le poloaiga mai le Fofoga Fetalai o le maota ia Papalii Lio Taeu
Masipa'u.

Talu ai ona o le tuumalo le ia Afioga ia Tapunu’u Papalii Niko Lee Hang , o le ala lea ua avanoa ai le nofoa palota o le Itumalo o Vaimauga 3. O le Afioga ia Papalii lea na manumalo i le faigapalota ua tuana'i ia Aperila 2021 ma sa avea fo'i ma Minisita o Tupe faapea fo'i
le Minisita o le Matagaluega o Galuega a le malo.

O se tasi o sui o lea tauva i lenei nofoa o le Afioga ia Veatauia Faatasi Puleiata lea e tu mai lalo o le vaega o le Faatuatua i le Atua Samua ua Tasi (F.A.S.T) i le palota la’ititi o luma nei. Ae o le vaega fa'aupu fai mo le Puipui Aia Tatau o Tagata (H.R.P.P) e le'o mailoa po'o ai se latou sui o le'a tauva mo le faigapalota o luma nei ia Fepuari 2023.