O loo Sailia Pea E Le Ofisa O Leoleo Le Mafua'aga O Le Maliu Faafuasei Ai Le Pule O Le TV3

Aotearoa Pesamino Mayer

Ata Pueina: Facebook

O lo'o fa'agāsolo pea suesuega a le Ofisa o Leoleo i le maliu ai o le tamaitai pule o le fale televise o le TV3 ia Aotearoa Pesamino Mayer i le Aso Gafua o le vaiaso nei.

E o'o mai lava i le asō e le'i maua lava i suesuega a le Matagaluega le mafua'aga tonu na ala ai ona maliu le tamaitai pule o le TV3.

Na tā'ua e le Komesina Lagolago o le Ofisa o Leoleo ia Pāpāli'i Monalisa Tia'i-Keti i se fono ma tusitala ma le au faasalalau i le Aso Lulu o le vaiaso nei, o lo'o taofia pea le tino maliu o le tamaitai pule i le fale o maliu i Motootua a'o tālia ai se foma'i suesue faapitoa o tino maliu po'o le "forensic pathologist" e fa'atino suesuega e uiga i lea mataupu.

"Ua mae'a ona tu'uina mai le faatonuga a le Pule o maliu o le a taofia le tino maliu o le mafine lea e Talia ai le taimi faatino ai Lona taotoga I le Aso 19 o le masina o Iulai o le tausaga nei."

"O lo'o tapena nei e le Matagaluega se tusi talosaga i le Ofisa o Leoleo a le Malo o Fiti mo se foma'i suesue faapitoa.

Na tā'ua fo'i e Pāpāli'i, e leai ni manu'a po'o ni bruises na maua i le tino maliu o le tamaitai pule i le taimi sa faatino ai suesuega a le Ofisa o Leoleo.

O Aotearoa Pesamino Mayer na asia e nisi o ana uo i le Aso Gafua o le vaiaso nei i lona fale i Ululoloa ma maua atu ai ua maliu o ia.

Na fa'ate'ia le toatele i le maliu ai o le tamaitai pule o le fale televise, e pei ona molimauina i faamaisega ma mo'omo'oga alofa a uo, aiga ma pelēga a Aotearoa i luga o upega tafailagi.