TAOFI MALAGA ONA O LOLOGA I NZ

Auckland Airport

Ata Pueina: 9 News

E lata i le 200 tagata malaga na toe o i fafo mai le vaalele o le Air New Zealand i le malaevaalele o Faleolo. 

I lipoti sa tuuina mai , e faapea o le po o le Aso Faraile na mavae atu nei na tuu e alu ese atu ai le vaalele o le Air New Zealand A321-271NX (NZ999) i le 8:30pm. Ae ina ua maua tala i le leaga tele o le tau i Aukilani na fautuaina ai loa le pasese mamalu ina ia toe aga'i totonu o le malae vaalele i Faleolo.

Sa fa'alia le lē fiafia o le mamalu o le pasese na tuu e faimalaga atu i Niu Sila. Se tasi o tamaita'i e suafa ia Oneata Taofi na ia saunoa i le mataupu e faapea o lona to'alua na tuu e malaga i Niu Sila aua le asiga o se tasi o ona tua'a o loo taofia i le falemai i Aukilani. 

"Faigata ona o le mataupu na tula'i mai i Aukilani ua toe tolopo ai nei lona vaa , ae e manaia peana aumai se fautuaga o lea tolopo le vaa , auā o lea na iloa lava o loo leaga le tau i Aukilani ae leai se faasalalauga na tuuina mai e le Ofisa o Niu Sila po'o le malae vaalele fo'i" saunoaga Oneata Taofi.

Tusa ai ma lipoti a le au tusitusi ma tagata faasalalau i Niu Sila , o le taulaga o Aukilani na faapea ona aafia tele i timuga ma lologa matautia. Toeititi oo le 240 malaga na taofia , aofia ai malaga o le Pasefika ma le lalolagi atoa. 

I nisi o lipoti ua faamaonia nei e leoleo Niu Sila le maimau ai o soifua o ni tagata se to'alua mai lenei mala faalenatura. I nei maliu o se tasi o se tamaititi na maua mai lona tino maliu i se paka taavale i North Shore. 

O loo faagasolo pea e ofisa leoleo ma faalavelave faafuasei a Niu Sila ia suesuega aua nisi o loo leiloloa ma lavevea i lenei lologa matautia. O loo taalia pea faamatalaga mo lenei faalavelave faafuase'i.