PEPA O FA’AMATALAGA MAI LE MATĀGALUEGA O TUPE FAATATAU I LE FA’ALAVELAVE TAU TA’AVALE I VICTORIA, AUSETALIA

O le afiafi o le Aso 12 o Novema 2023, na fa’ailoa aloā’ia mai ai e le Sui So’o’upu o Galuega Fa’avaitaimi a Samoa i Sini, Ausetalia le fa’alavelave tau ta’avale ua a’afia ai nisi o tamafanau a Samoa o lo’o galulue i le polokalame o Galuega Fa’avaitaimi i Ausetalia (Pacific Australia Labour Mobility Scheme / P.A.L.M.). O lenei fa’alavelave tau ta’avale ua māliliu ai ni ali’i e to’afā (4), o alo o Samoa o lo’o galulue konekarate i le Kamupanī o le Flavorite Hydroponics / Murphy Fresh. O suafa ma fa’amatalaga nei e patino i nei alo o le atunu’u na a’afia i lenei fa’alavelave fa’afuase’i;

1. Apera’amo Tapelu mai le afio’aga o Letogo, Upolu. E 24 tausaga le matua o le soifua.

2. Alesana Anitele’a mai le afio’aga o Safotu, Savai’i. O se tamā e 34 tausaga le matua o le soifua ma ua fai le ‘āiga, e to’atasi si ona alo.

3. David Atonio Gasologa mai le afio’aga o Falefā, Upolu. E 27 tausaga le matua.

4. Darrick Amouta Peleti mai afio’aga o Lufilufi ma Falevao, Upolu. E 28 tausaga o le soifua. E tusa ai ma fa’amaumauga i le auai o nei alo o le atunu’u i galuega fa’avaitaimi, o ni ali’i fa’amaoni ma fa’amoemoeina i le fa’atinoga o ā latou galuega, ma e le’o se taimi muamua lenei ua fa’amanuiaina ai i latou i konekarate mo galuega fa’avaitaimi. Sa tu’ua e nei alo o Samoa le atunu’u i le masina o Iulai 2023 ma le fuafuaga e fa’amae’aina a latou konekarate ma toe taliu mai

i Samoa iā Me 2024. Ua mae’a ona feiloa’i atu sui o le Matāgaluega i le Vaega o Galuega Fa’avaitaimi i sui o nai ‘āiga o i latou ua māliliu i lenei fa’alavelave e fa’ailoa aloā’ia lenei tala fa’anoanoa aemaise le tulaga o galuega ma su’esu’ega o lo’o fa’agasolo pea i le taimi nei, ma o lo’o fa’aauau pea galuega fa’atino a le Matāgaluega e tauala i feso’ota’iga ma nai ‘āiga i le tulaga ua o’o i ai galuega ma su’esu’ega. O lo’o galulue so’oso’otau’au le Matāgaluega o Tupe (M.O.F.), le Matāgaluega o le Va i Fafo

(M.F.A.T.) e tauala atu i le Komesina o Samoa i Ausetalia mo le fetu’una’iga ma le fa’amautūina o le auina mai i Samoa nei o tino māliliu o i latou nei, pe ā mae’a ma fa’amalieina uma su’esu’ega e tatau ona fa’atinoina. E le’o mafai ona fa’ailoa aloā’ia le mafua’aga o lenei fa’alavelave ona o lo’o tālia su’esu’ega fa’apitoa. E tu’uina atu ai se tu’ualalo i le mamalu o si o tatou atunu’u, mo lo outou finagalo malamalama, ina ia tatou ‘alo ‘ese mai le fe’avea’i o ni fa’amatalaga lē aloā’ia e ono a’afia ai

lagona ma finagalo o nai ‘āiga o i latou ua māliliu i lenei taimi faigatā. E avea ai fo’i lenei avanoa e toe molimoli atu ai fa’amaisega a le tatou Mālō e tauala atu i le

Matāgaluega o Tupe i le pa’ia o ‘āiga, aemaise lava nai mātua, to’alua ma nai fanau loto fa’anoanoa ona o le valā’au pa’ia a le Atua i nei alo o le atunu’u. O lo’o fa’amauina fo’i, talu ona amatalia le Polokalame o Galuega Fa’avaitaimi o le R.S.E. a Niu Sila i le faigāpa’aga ma Samoa i le 2007, e to’afā e ua māliliu a’o i ai i Niu Sila iā latou konekarate. A’o le Polokalame o Galuega Fa’avaitaimi a Ausetalia le P.A.L.M. e to’a 12 tamafanau a le atunu’u

ua māliliu talu mai le 2012. O lo’o fa’amauina fo’i, o i latou uma ua māliliu, e le’o luga o taimi faigaluega.