SAILIA SE ISI ATUNU'U E TALIMALO I LE TAAMILOSAGA O LE IPU O LE LALOLAGI O LE LAKAPI LIKI 2025 INA UA FAAMAVAE ESE FARANI

O le Malo o Farani na tu'u o le a talimalo i le Ipu o le Lalolagi o le Lakapi Liki i le lua tausaga o lumanai, ae peitai, o lea ua fa'ailoa mai e le Iuni Lakapi Liki a Farani le latou le mafai ai lea ona o latou talimalo i lea faamoemoe tele.

Na taua e le Iuni Lakapi Liki a Farani, e le mafai ona faatautaia lea faamoemoe i totonu o a latou laufanua ona o ni isi o tulaga e pei o le tu'ufa'atasia o se tala fa'asolo po'o se ripoti mo meatotino e ono faaleagaina (risk of loss report) i le taimi o le Ipu o le Lalolagi. 

O lea faaiuga a le Iuni Lakapi Liki a Farani ina ia faamamulu, ua avea ma itu ua faanoanoa tele ai le Faalapotopotoga Lakapi Liki Faavaomaloo po'o le International Rugby League (I.R.L). 

Na fa'aalia e le Taitaifono o le I.R.L ia Troy Grant, "E faigata ona faʻaalia loʻu le fiafia i lenei tala."

Na ia taua foi, o le a fono le IRL i le masina o Iulai o le tausag nei e iloilo ma toe filifilii ai se isi atunu'u e mafai ona talimalo i le Ipu o le Lalolagi 2025.

"Ou te faʻaaloalo ma aloaia le faaiuga a le malo o Farani ona o luitau o loʻo latou feagai ai, ae e le mafai ona natia loʻu le fiafia, na ou faʻaalia manino atu ia te i latou," o le saunoaga lea a Grant.

O le taimi lona lua lenei ua le mafai ai e se atunu'u ona talimalo i le Ipu o le Lalolagi e pei o le tausaga e 2018 lea na le mafai ai e Amerika ona talimalo foi i lea faamoemoe.

O lo'o vaavaai le I.R.L agai ia Ausetalia ma Niu Sila ona o atunu'u ia e lua o lo'o iai le avanoa e fia talimalo ai i le Ipu o le Lalolagi.

O le aso lea e fono ai le laulau e talanoaina se isi agaiga ona o lea ua faamamulu Farani.