FA'AMAMA E "TAMA O LE VINEULA" LE MATAFAGA I APIA

Tama O Le Vineula

Ata Pueina: Eyespyradio 87.5FM

O le Aso Gafua o le vaiaso nei na fa'amama ma ta'alao ai e le aumaga o le "Tama o le Vineula" mai i  Apia le matafaga a le latou afioaga.

Na taua e le ali'i pulenu'u a Apia ia Tuiletufuga Fritz Tuiavaii i se fa'atalatalanoaga ma le leitio a le Eyespy, o le auga ma le faamoemoe o lea galuega sa faatino, o le faamama ma faamatagofieina lea o le matafaga a le afioaga a'o loma ai ni isi o fa'amoemoe tele o le a faia mai i Samoa nei e pei o le tu'ugava'a a le International Va'a Federation (IVF) lea o le a faia i le Aso 26 o Aokuso.

Tama O Le Vineula

Ata Pueina: Eyespyradio 87.5FM

E le gata i lea, o le masina fou lea o le a faamanatu ai le tutoatasi a Samoa, faapea ai foi le konoseti a le Motherland Samoa lea o le a faia i le Aso 3 o Iuni.

"O lea galuega sa faia e le aumaga na mafai ona faatino ona o le foa'i tasi miliona a le malo mo le itumalo o Vaimauga 4 lea e 9 afioaga o lo'o aofia iai. E $47,222.00 tala le vaega muamua na tauaaoina mai mo Apia, ma na fuafuaina o le a faaoga lea tupe e fausia ai se fale komiti.

"Peitai, o lea o le a faaogaina i ni isi o poloketi a le aumaga lea e aofia ai ma le faamamaina o le matafaga a le alalafaga," o le saunoaga lea a tuiletufuga.

Na ia taua foi na fa'afeso'ota'i e le nu'u le Matagaluega o Punaoa faalenatura ma Siosiomaga (M.N.R.E) mo se fesoasoani i le faamamaina lea o le matafaga ona o le tulaga faaletonu sa iai ona o le tele o lapisi sa mataga ai le matafaga, ae e o'o mai i le taimi nei e le'i tali atu lava le Matagaluega, o lea na tonu ai loa o le a fa'atino e le aumaga le ta'alaoina ma le fa'amamaina lea o lapisi ma otaota sa i le matafaga.

Tama O Le Vineula

Ata Pueina: Eyespyradio 87.5FM

O le tatalo a le ali'i pulenu'u i le mamalu o le atunu'u, ia galulue fa'atasi e fa'atumau le matagafoie ma le lalelei o laufanua a si o tatou atunu'u aua turisi ma tagata tafafao maimoa mai i fafo o le a asia Samoa.