FETAUI LE MANU SAMOA MA AIALANI FAAPEA AI MA IAPANI A'O SAUNI AI MO LE IPU O LE LALOLAGI 2023
Ata Pueina: FBC News
I se pepa o fa'amatalaga na tu'uina mai e le Pulega a le Lakapi Samoa, o lo'o fa'ailoa mai ai o le a ta'aalo ai le Manu Samoa 15 ma le au a Iapani faapea ai ma le au malosi mai i Aialani lea o lo'o numera tasi i le taimi nei i le faatulagaga o au lakapi taitoasefelulima a le lalolagi.
O le masina o Iulai o le a amata tapena ai le au a le atunu'u mo ia ta'aloga (test matches) , ma o le a feto'ai muamua le Manu Samoa ma Iapani i le Aso 22 o Iulai i totonu lava o Iapani i Hokkaido, ae o le Aso 26 o Aokuso o le a ta'aalo ai le Manu ma le au a Aialani i totonu o Bayonne i Farani.
O le mae'a ai o le ta'aloga ma Iapani i le Aso 22 o Iulai, o le a toe taliu mai ai le Manu Samoa i Samoa nei e ta'aalo ai ma Fiti i le Aso 29 o Iulai, fa'apea ai ma Toga i le Aso 5 o Aokuso i le malae taalo faavaomalo o le Apia Park, ma o le taimi muamua lea o le a toe ta'aalo ai le au a le atunu'u i Samoa nei talu ona tatala vavao o le Koviti-19 i le amataga o lenei tausaga.
Na ta'ua e le Pule Sili o le Lakapi Samoa ia Faleomavaega Vincent Fepuleai, o se itu lelei le mafai ai lea ona toe faatautaia o nei ta'aloga i totonu o le atunuu. "Ou te talitonu foi o se tala fiafia lea mo nai o tatou tagata ua leva ona fia matamata i ta'aloga a le Manu Samoa 15 i le paka.
Na saunoa foi le ali'i faiaoga ulu o le Manu Samoa ia Vaovasamanaia Seilala Mapusua, o lo'o tulaga lelei uma tapenaga a lana au mo ta'aloga o lo'o loma nei, ma o le mafai ai e le Manu Samoa ona ta'aalo ai lea ma Aialani a'o le'i amatalia le Ipu o le Lalolagi, o se avanoa fa'aauro lea mo lana au.
"O ta'aloga uma fo'i o lo'o fuafua e faia a'o le'i amata le Ipu o le Lalolagi, o se avanoa lelei tele lea mo le Manu Samoa e ta'aalo ai ma ituaiga au eseese a'o le'i faia le Ipu o le Lalolagi i Farani i le tausaga nei.
O le vaiaso muamua o le masina o Aokuso o le a lauina ai le lisi o le au a le Manu Samoa mo le Ipu o le Lalolagi, ma o le Aso 4 o Setema ua atofa e taunu'u ai le Manu Samoa i le nofoaga o le a faamautu ai i Montpellier.
O Samoa o lo'o iai fa'atasi ma Egelani, Iapani, Argentina, ma Chile i le Pulu D o le Ipu o le Lalolagi.