SAUNI LE MALO E FAAPAIA MA TATALA LE FAAOGAINA O LE $60 TUPE PEPA FOU

Agafili Shem Leo

Ata Pueina: Anetone Sagaga/ Eyespy Radio Samoa

O le Aso 26 o lenei masina ua fuafuaina e le Malo o Samoa e fa’apa'ia ai mo le fa’aāogaina e le mamalu o le atunuu le $60 tupe Samoa fou, aua le faamanatuina ai lea o le aulia manuia e Samoa o lona 60 tausaga talu ona tutoatasi.

Na faailoa mai e le Ofisa Sili o Pulega o le Matāgaluega a le Palemia ma le Kapeneta ia Agafili Shem Leo, e faapea o se itula fa’aaoauli po’o le afiafi, ua fuafua e fa’ataunu’uina ai le fa’apā'iaina o lea seleni mo lona fa’aāogaina. 

O se itu e iloga ai le aulia manuia e Samoa o le 60 tausaga talu ona tuto’atasi mai i pulega  faakolone ma pulea ai lava e ona lava tagata si o tatou atunu’u.

O le aotelega o lenei fuafuaga lelei a le Mālō o le a mafai ona folasia i le aso tonu o le a fa’atinoina ai lenei fa’amoemoe tāua. 

O lea $60 o le faaogaina, o le a manatua ai pea lenei tuto’atasi, aemaise o se ulua’i taimi ua fa’agasolo ai polokalame ta’itasi mo le tausaga atoa auā le samiga o lo tatou 60 tausaga o le tutoatasi.