Sauni Tofiga E Fa'afiafia I Le Taumeasina
Tofiga Fepuleai
Ata Pueina: Eyespy Radio
Ua taunuu mai i Samoa nei se tasi o alo o le atunuu ua iloga i le lalolagi atoa ona o lana taleni o le faifaleaitu ma ata malie, le susuga ia Tofiga Fepuleai. O lo'o malaga mai Tofiga aua se faafiafiaga o le faatautai i le Aso Faraile nei i le faletalimalo o le Taumeasina Island Resort.
Sa faailoa e Tofiga i luga o upega tafailagi poo le Facebook i le masina o Tesema ua mavae atu, o le taimi muamua lenei ua mafai ona toe asiasi mai ai i Samoa talu ona o le faamai oti o le Koviti19 i le lalolagi.
Na ia faaopoopo mai o loo ia tapena ia e faafiafia ma faaoso le ata i ona tagatanuu i le afiafi o le Aso Faraile 6 Ianuari.
Na ta'ua e Tofiga i se faatalatalanoaga ma le Eyespy Radio i le taeao o le Aso Faraile o nisi o mataupu o le a faatatau iai lana faafiafiaga e aofia ai Le Koviti19 ma nisi lava o faafitauli na aliae ifo o na o lea faama'i.
O pepa matamata poo tickets mo lana fa'aaliga o lo'o fa'atauina i le Taumeasina Island Resort i le SAT$60 mo tagata matutua ae afa le tau mo le fanau.
O le taimi mulimuli na faatino ai e Tofiga se faaaliga i Samoa o le tausaga e 2019 ma sa faatautaia foi i le faletalimalo o leTaumeasina. Ma o lea faafiafiaga sa ta’ua ma faaigoaina o le “fa’amalie atu” lea na toatele foi e na maimoa iai.
Na ia fa’asoa ai ni tala malie e uiga i lana mafutaga ma ona atali’i e to’atolu, o le sailiga faifaipea a Aunty Tala mo Mr. Right, ma le uiga fa’amata’u masani a lona uncle.
Ua silia ma le 13 tausaga sa faafiafia ai Tofiga ma lana uo mamae o Eteuati Ete i le la kulupu o le "Laughing Samoans", ae o le 2017 na taape ai ma faafiafia toatasi ai loa na o Tofiga.
I le faaiu ai o le faatalatalanoaga a le Eyespy ma Tofiga, na faamalosiau ai Tofiga i tupulaga talavaou o Samoa o loo fia ausia a latou miti poo moomooga i lenei olaga ina ia tumau i faiga faaleaganuu ua masani ai samoa e pei o le faamuamua o matua faapea ma aiga.
"A lelei foi tagata ma uo e tou te faatasi, e faapena foi ona maua ai fautuga lelei ma timaiga e agai ai i luma au taumafaiga,"
"E le gata i lea, a e faatuatua lava oe ia te oe ia e te mafai soo se mea, o le ki lea i le manuia," saunoa mai Tofiga.
O Tofiga e mai afioaga o Safotulafai, Saleaula, Papa Sataua, Falealupo, Sagone ma Fasito’o-uta.