Sauni Tupuola Ato Plodzicki e iloilo ma le ali'i fusu mai i Fiti o Isikeli Senidoko

Ato vs Isikeli

Ata Pueaina: Supplied

O lo'o fa'agasolo nei tapenaga a se tasi o alo fusu a le atunu'u ia Tupuola Ato Plodzicki Faoagali mo lana fusuaga lona lua faapolofesa lea o le a la iloilo ai ma le ali'i fusu mai i Fiti ia Isikeli "Bullet" Senidoko.

O lea fusuaga o le a fa'atautaia i totonu o Samoa i le Aso 23 o Iuni o le tausaga nei, ma na ta’ua e Tupuola o lana paga o le a laua feto'ai o se tagata malosi tele.

"O Senidoko o se tagata ua leva ona fusu i totonu o Fiti, ae e le o avea lea ma itu e faapopoleina ai lo'u nei tagata ona o lea ou te fa'amaoni i a'u koleniga ma ou te talitonu ua ou lava tapena mo le ma fetauiga.

E tolu kamupani e aofia ai le faletalimalo a le Tanoa, Marist St Joseph Sports Club ma le Wheels for Rent at Dannys lea o loo lagolagoina malosi lenei alo o Samoa ma ana taumafaiga aemaise lava i le fusuaga o lo'o loma nei.

Na ia saunoa fo'i,  o lo'o ia mo'omia ni isi kamupani e lagolagoina o ia ma ana taumafaiga.

“E mo'omia lava le tele o ni isi e fesoasoani mai, ma afai o iai nisi e fia lagolagoina lo’u nei tagata faafesootai mai a’u i luga le Tusi Foliga po'o le Facebook.

O Tupuola o lo'o faigaluega full-time o ia i le taimi nei, ma o se tasi lea o faafitauli o lo'o feagai ma ia, o le taufaaofi lea o ana koleniga i vaiaso taitasi ona o lona tuatuagia i le galuega.

“E faalua ona ou koleni i le aso ona ou sauni lea i po ou te alu ou te faigaluega, o la’u lava lea schedule i aso uma.

“O le ala lea o le tau sailia ai o ni sponsors se tele e lagolagoina lenei faamoemoe.

O Faoagali o loo fuafua e auai i koleniga i le 2 vaiaso a'o le'i faia lana fusuaga faapolofesa lenei e sailia ai se aufusu a Samoa mo taaloga a le Pasefika e faia i Solomona.

“Ou te auai i toleniga nei ona o le naunautaiga lava ia mafai ona tauaveina le tagavai a le atunuu i taaloga a le Pasefika ia Novema o le tausaga nei."