FA'ALAUILOAINA LE AU FILIFILIA A MULI'AGATELE BRIAN LĪMĀ MO LE VAE FA'AI'U O LE TA'AMILOSAGA TA'ITO'AFITU A LE LALOLAGI I LONETONA
Manu Samoa Sevens Squad Named
Photo: Manu Samoa Sevens Facebook
O le aso ananafi (Aso Tofi 18 o Me) na fa'alauiloaina ai le lisi o tama ta'a'alo e to'asefulumaletolu (13) ua filifilia i totonu o le au a le Manu Samoa Ta'toa'afitu lea o le a tausinio i le vae fa'ai'u o le Ta'amilosaga Ta'ito'afitu o le Lalolagi (World Sevens Series 2022 - 2023).
O le vae e taualuga ai le Ta'amilosaga Ta'itoafitu a le Lalolagi 2022 - 2023, o le a fa'atautaia i totonu o Lonetona i Peretania i le fa'ai'uga o le vaiaso nei mai i le Aso To'ona'i 20 o Me se ia pā'ia le Aso Sā 21 o Me.
I le māe'a ai o le vae o le Ta'amilosaga Ta'ito'afitu a le Lalolagi sa fa'atautaia i le vaiaso ua tuana'i atu i totonu o Toulouse i Farani, e fā (4) ni suiga fou ua iai nei i le Manu Samoa mo le vae o lo'o loma nei i Lonetona.
O le māfua'aga o nei suiga, ona ua mānunu'a ni isi o sui o le au e aofia ai Paul Scanlan, Levi Milford, Steve Onosa'i, BJ Līmā, ma Fa'amaoni Su'etena.
O sui e to'afā ua suitulaga ia i latou ua manunu'a, o Melani Matavao, Fuli Fa'afouina, fa'apea Pisi Leilua ma Elijah Niko mai i le kalapu lakapi a le Aukilani Malisi i Niu Sila.
O Samoa o lo'o tu'ufa'atasia ma Ausetalia, Farani, ma Sepania i le Pulu C.
O le ta'aloga muamua a le Manu o le a ta'a'alo ai ma Farani i le 9:01pm (Taimi Samoa) i le po o le Aso To'ona'i.
Ona soso'o ai lea ma lana ta'aloga lona lua ma le au a Ausetalia i le 12:47am i le vaveao o le Aso Sā
O le ta'aloga mulimuli a le Manu i le Pulu C o le a feto'ai ai ma Sepania i le 4:08am i le taeao o le Aso Sā.
MA O LE LISI LENEI O LAU MANU SAMOA 7s O LE A TAUSINIO I LE VAE FA'AI'U I LONETONA:
1. Va'afauese Apelu Maliko
2. Vaovasa Afa Su'a
3. Melani Matavao
4. Taunu'u Niulevaea
5. Paul Eti Slater
6. Motu Opetai
7. Neueli Leitufia
8. Fa'afo'i Falaniko
9. Malakesi Masefau
10. Malo Luteru
11. Elijah Niko
12.Pisi Leilua
13. Fuli Fa'afouina
Faia'oga Ta'iulu: Muli'agatele Brian Līmā.