TULAGA TOLU SAMOA LE TA'AMILOSAGA TA'ITO'AFITU I LONETONA

Manu Samoa Sevens 24 - 19 New Zealand

Ata Pueina: HSBC 7’s

E ui e le'i manuia taumafaiga a le au a le atunu'u mo sona avanoa e auai atu ai i Ta'aloga o le Olimipeka i le tausaga fou ina ua malolo i le la ta'aloga ma Argentina i le semifinal o le ipu autu i 'ai e 10 - 07, ae na manumalo ia Niu Sila i le sā'iliga o le tulaga tolu (3) o le vae fa'ai'u o le Ta'amilosaga Ta'toa'afitu mo lenei tausaga i Lonetona Peretania.

O se ta'aloga finau tele na vaaia ai le malosi tele o le osofai a Niu Sila i minute amata o le afa muamua.

Ae e le'i faavaivai iai le Manu lea e toe o nai minute o totoe i le afa mulimuli o tutusa ai e 19 - 19.

Na la'asia e Taunu'u Niulevaea le laina sikoa a Niu Sila i nai sekone mulimuli o lea taaloga ma manumalo ai i 'ai e 24 - 19.

Na maua le avanoa e sao atu ai Samoa i Ta'aloga o le Olimipeka ina ua faia'ina Ausetalia i le 'au a Farani i le semifinal mo le sā'iliga o le tulaga (5). 

Peita'i, e le'i mafai ona ausia e Samoa lea fa'anaunautai'ga ina ua malolo i le Los Pumas mai i Argentina.

O lona uiga, e toe pau le auala e mafai ai ona maua ai se avanoa a le Manu mo le Olimipeka, pe afai ae manumalo i le Oceania Sevens Championships i le faai'uga o lenei tausaga i le masina o Novema.

Na ausia foi e Vaa Apelu Maliko se tasi o matatia ina ua ia maua sikoa e 50 ma manumalo ai i le faailoga o le Golden Ball mo le tama taalo e sikoa silia ile mae'a ai o le Ta'amilosaga Ta'ito'afitu a le Lalolagi.