SAUNI LE TOLOTOLO O TAMA ULI MO LE TŪ'UGA FAUTASI O LE TŪTO'ATASI

Tolotolo o Tama Uli

Ata Pueaina: Bethel Peato/ Eyespy Radio Samoa

O le taeao analeila na fa'agāsolo ai ni isi o toleniga i le Penusula i Matautu a le auva'a o le Tolotolo o Tama Uli mai i le afioaga o Salelologa i Puleono Salāfai, 'auā le tū'uga fautasi e fa'amanatuina ai le atoa ai lea o le 60 tausaga talu ona tutoatasi si o tatou atunu'u.

O lea fa'amoemoe ua atofa e fa'atautaia i le faai'uga o lenei masina.

I se fa'atalatalanoaga a le leitio o le Eyespy ma se tasi o sui o le auva'a, le susuga ia Uso Limu Kolia, na ia tā'ua ai o le vaveao analeila ae le'i aga'i mai mo Matautu, sa faia ai ni isi o a latou toleniga e pei o tāmo'ega ma siva.

"O le naunautaiga lava o ia toleniga, o le lava lea o le mānava po'o le fitness o alo ma tama fanau nei o lolo'o i totonu o le auva'a.

Na ia saunoa foi o se tasi o faafitauli sa feagai ma le auva'a, o le lē lava lea o le taimi e tapena ai mo le tu'uga.

Ae na ia taua, e lē o avea lea tulaga ma itu e faavaivai ai mo le tu'uga.

O le fautasi o le Tolotolo o Tama Uli o lo'o aloina e alo tama fanau o le afioaga o Salelologa, ma o lea vaa sa avea ma siamupini i ni isi o tu'uga fautasi i nai tausaga ua mavae atu.